राम मंदिराच्या दान चोरीच्या मुद्द्यावरून आदित्य ठाकरेंचा अधिवेशनातला हा रुद्रावतार.. भाजपच्या आमदारांना थेट दानचोर म्हणत अंगावर धावून जाणाऱ्या आदित्य ठाकरेंच्या या उग्र रूपाने राजकीय वर्तुळासह सोशल मीडिया गाजवला. पण हा वार जिव्हारी लागताच, ठाकरेंचे कट्टर राजकीय विरोधक आणि मुख्यमंत्री एकनाथ शिंदेंनी मोठा पलटवार केला. विरोधकांची कोंडी करण्यासाठी शिंदेंनी थेट साडेतीन वर्षांपूर्वीच्या सिद्धीविनायक मंदिरातील कथित अपहाराचं भूत बाहेर बाहेर काढलं. शिंदेंच्या या एकाच चालीने एका दगडात दोन पक्षी मारल्याची चर्चा आता रंगू लागलीये.

उपमुख्यमंत्री शिंदेंनी सिद्धीविनायक मंदिरातील अपहाराचा जो मुद्दा उपस्थित केला तो मूळचा मनसेच्या यशवंत किल्लेदारांचा होता. त्यावेळी किल्लेदारांनी थेट पुराव्यांसह भ्रष्टाचाराचे गंभीर आरोप केले होते. काय होते ते आरोप? पाहा..

न्यासाच्या घटनेत तरतूद नसतांना शिवभोजन थाळीसाठी 5 कोटींचे अर्थसहाय्य

कोरोना काळात प्लाझ्मा दान मोहिमेत निधीचा गैरवापर

सिद्धीविनायक मंदिरातील नोकरभरतीत भ्रष्टाचार

मंदिरातील टेंडर प्रक्रियेत पारदर्शकतेचा अभाव

मनसेचे यशवंत किल्लेदार यांनी थेट आदेश बांदेकर आणि तत्कालीन कार्यकारी सदस्यांविरोधात थेट पोलिसांत तक्रार केली होती. तेव्हा गृहमंत्री देवेंद्र फडणवीसांनी हिवाळी अधिवेशनात चौकशी करून कारवाईचं आश्वासनही दिलं होतं. मग तरीही साडेतीन वर्ष ही कारवाई का रेंगाळली? असा सवाल आता उपस्थित होतोय. तर दुसरीकडे, आदित्य ठाकरेंनी शिंदेंच्या या आरोपांची हवा काढत त्यांच्यावरच उलटवार केलाय.

तीन महिन्यांपूर्वीच सिद्धीविनायक मंदिरात एका कर्मचाऱ्याला दानचोरी करताना रंगेहात पकडलं गेलं, एफआयआर झाला, अटकही झाली. मंदिर न्यासानं दिलेल्या पुराव्यांवरच पोलिसांनी ही कारवाई केली. या संपूर्ण प्रकरणाची सखोल चौकशी करण्याची गरज असताना... आता केवळ राम मंदिरातील चोरीविरोधात बोलणाऱ्या विरोधकांचं तोंड बंद करण्यासाठीच, तीन वर्षांपूर्वीच्या अपहाराचा हा जुना मुद्दा उकरून काढला जातोय का? कारण, ठाकरेंनी भाजपवर दानचोरीचे आरोप करताच, शिंदेंनी थेट सिद्धीविनायकाचा मुद्दा काढला. या एकाच खेळीने शिंदेंनी ठाकरेंना तर कोंडीत पकडलंच, शिवाय भाजपच्या दिल्लीश्वरांना खुश करत राज्यातील भाजपच्या नेतृत्वाचीही कोंडी केली का? अशी आता राजकीय वर्तुळात जोरदार चर्चा सुरू झालीये. शह-काटशहच्या या राजकारणात दानचोर सुटता कामा नये इतकंच.