अभिजीत देशमुख

Latest Mumbai News : कल्याण कोळशेवाडी पोलीस ठाण्यात एका इसमाचा संशयास्पद मृत्यू झाल्याने एकच खळबळ उडाली. दीपक भिंगारदिवे अस या मृत व्यक्तीचे नाव आहे. दीपक भिंगारदिवे यांची पत्नी नंदा या राष्ट्रवादीच्या पदाधिकारी आहेत. दीपक यांच्या मुलाला कोळशेवाडी पोलिसांनी चौकशी पोलीस ठाण्यात आणले होते.

याबाबत भिंगारदिवे यांच्या कुटुंबीयांनी पोलिसांनी मारहाण केल्याने दीपक यांचा मृत्यू झाल्याचा आरोप करत जोपर्यंत न्याय मिळत नाही तोपर्यंत मृतदेह घेणार नाही असं सांगितलं .तर या प्रकरणी डीसीपी सचिन गुंजाळ यांनी पोलिसांनी मारहाण केल्याचे आरोप फेटाळले आहेत. या प्रकरणाची सीआयडीमार्फत चौकशी होणार असून कुणावरही अन्याय होणार नसल्याचे पोलिसांनी स्पष्ट केलं .

कल्याण (Kalyan) पूर्व कोळशेवाडी पोलीस ठाण्यात काल रात्री ऑल आऊट ऑपरेशन सुरू होते. त्याअंतर्गत प्रशिक भिंगारदिवे या तरुणाला पोलिसांनी चौकशीसाठी पोलीस ठाण्यात आणले होते. आपल्या मुलाला का आणले याबाबत विचारणा करण्यासाठी वडील दीपक भिंगारदिवे हे पोलीस ठाण्यात आले. दरम्यान पोलीस विचारपूस करत असताना दीपक आपल्य मोबाईलमधून शूटिंग करत होते

यांच दरम्यान त्यांची पोलिसांशी बाचाबाची झाली. काही वेळाने दिपक भिंगारदिवे यांना फिट आली. त्यांना पोलिसांनी रुग्णालयात नेले. दरम्यान डॉक्टरांनी (Doctor) त्यांना मृत घोषित केले. या प्रकरणी भिंगारदिवे कुटुंबियानी दीपक यांच्या मृत्यूला पोलीस जबाबदार असल्याचा आरोप केला आहे.

व्हिडियो काढताना पोलिसांनी (Police) मारहाण केल्याने दीपक यांचा मृत्यू झालाय. पोलीसच दीपक यांच्या मृत्यूला जबाबदार असून आम्हाला न्याय पाहिजे अन्यथा तोपर्यंत मृतदेह ताब्यात घेणार नाही असे कुटुंबीयाने स्पष्ट केले.

दरम्यान, याबाबत आमदार जितेंद्र आव्हाड (Jitendra Awhad) यांनी ट्विट केले आहे. पोलिसांनी विनाकारण मारहाण केल्याचा आरोप करत न्याय देण्याची मागणी केली आहे. तर या प्रकरणी पोलिसांनी मात्र आरोप फेटाळून लावताना कुणावरही अन्याय होणार नाही या प्रकरणाची सीआयडी मार्फत चौकशी करणार असल्याचे सांगितले.