सोलापूर : सोलापूर जिल्ह्यातील अकलूज येथे सयाजीराजे पार्कमध्ये फिरत्या पाळण्याचा अपघात घडला आहे. फिरता पाळणा वेगात फिरत असताना त्यातील एक पाळणा वेगात खाली पडला. या अपघातामध्ये पुण्याच्या प्रसिद्ध उद्योजकाचा मृत्यू झाला आहे, तर चार जण जखमी झाल्याची माहिती आहे, ज्यातल्या एकाची प्रकृती गंभीर आहे. तर तुषार धुमाळ असं अपघातात मृत्यू झालेल्या उद्योजकाचं नाव आहे. तुषार धुमाळ हे पुणे जिल्ह्यातील भिगवणचे प्रसिद्ध एलआयसी उद्योजक होते.

फिरता पाळणा पडल्याचा व्हिडीओ सोशल मीडियावर व्हायरल

अकलूजच्या सायजीराजे पार्कमधील या अपघाताचा धक्कादायक व्हिडिओही सोशल मीडियावर प्रचंड व्हायरल होत आहे. राईड सुरू झाल्यानंतर काही वेळामध्येच पाळणा कोसळला आणि संपूर्ण पार्क आक्रोश आणि किंकाळ्यांच्या आवाजांनी हादरला. आज बुधवारी दुपारच्या सुमारास हा अपघात झाल्याची प्राथमिक माहिती प्राप्त झाली आहे.

पुणे जिल्ह्यातील भिगवण येथील तुषार धुमाळ हे त्यांच्या दोन मित्रांसह सयाजीराजे वॉटर पार्कमध्ये फिरायला आले होते. तिघे मित्र राईडमध्ये बसले, पण राईडचा वेग वाढल्यानंतर अचानक पाळणा खाली कोसळला. राईडचा वेग जास्त असल्यामुळे पाळणाही त्याच वेगामध्ये खाली पडला आणि तुषार धुमाळ यांना गंभीर दुखापत झाली.

पाळणा अतिशय वेगात खाली पडला. अपघातानंतर तुषार धुमाळ यांना तातडीने रुग्णालयात उपचारासाठी दाखल करण्यात आले. उपचार सुरू होण्याआधीच धुमाळ यांचा मृत्यू झाला. या अपघातामध्ये धुमाळ यांचे दोन मित्रही जखमी झाले आहेत. पण त्यांना गंभीर दुखापत झाली नाही. धुमाळ यांच्या मित्रांनाही रुग्णालयात उपचारासाठी दाखल करण्यात आले आहे.