मुंबई - राष्ट्रवादी काँग्रेसचे अध्यक्ष शरद पवार (Sharad Pawar) यांच्या सिल्वर ओकवर या मुंबईतील बंगल्यावर केलेल्या हल्ल्याप्रकरणी जामिनावर सुटलेल्या वकील गुणरत्न सदावर्ते यांच्या पत्नी जयश्री पाटील या देखील सहआरोपी आहेत. त्यामुळे अटक टाळण्यासाठी जयश्री पाटील यांनी मुंबई सत्र न्यायालयामध्ये अटकपूर्व जामिनासाठी धाव घेतली आहे. या अटकपूर्व जामिनावर आज सुनावणी पूर्ण झाली असून न्या. आर. एम. सादराणी यांनी निकाल राखून ठेवला आहे. उद्या दुपारी ३ वाजता अटकपूर्व जामिनावर कोर्ट निर्णय देणार आहे.

वकील जयश्री पाटील यांच्यासह तीन एसटी कामगारांच्या जामीन अर्जावर देखील कोर्ट उद्या निर्णय देणार आहे. त्यामुळे जयश्री पाटील यांना कोर्टाकडून दिलासा मिळणार की नाही यावर उद्या कोर्ट निकाल देणार आहे. जयश्री पाटील (Jayashree Patil) यांच्यावरही सिल्वर ओक हल्ल्या प्रकरणात गुन्हा नोंद करण्यात आला असून या प्रकरणात अटकेपासून संरक्षण मिळावं यासाठी त्यांनी अप्पर सत्र न्यायाधीश आर एम सादराणी यांच्या समोर याचिका दाखल केला आहे.

तसेच सिल्व्हर ओक हल्ल्या प्रकरणातील आरोपी गुणरत्न सदावर्ते आणि ११५ आंदोलक कर्मचाऱ्यांना अलीकडेच जामीन मिळाला आहे. सदावर्ते यांना ५० हजार रुपये रोख हमी आणि तितक्याच रकमेचा हमीदार तसेच सर्व ११५ कर्मचाऱ्यांना प्रत्येकी १० हजार रुपयांच्या वैयक्तिक हमीवर जामीन मंजूर करण्यात आला आहे.

शरद पवार यांच्या निवासस्थानी 8 एप्रिल रोजी साधारण दुपारच्या सुमारास हजारो एसटी कर्मचाऱ्यांनी धडक देत मोठ्या प्रमाणात आंदोलन केले होते. या घटनेनंतर राज्यातील राजकीय वातावरण चांगलेच तापले होते. घटनेनंतर साधराणतः तासाभराच्या प्रयत्नांनंतर पोलिसांनी परिस्थितीवर नियंत्रण मिळवले होते. दरम्यान, या घटनेत, आंदोलक कर्मचाऱ्यांना भडकवल्या प्रकरणी अॅड. गुणरत्न सदावर्ते यांच्यावर आरोप करण्यात आला होता. तसेच त्यांच्या विरोधात गुन्हादेखील दाखल करण्यात आला होता. या सर्व घटनेप्रकरणी गावदेवी पोलीस स्थानकांत गुन्हा दाखल करण्यात आला आहे.