मुंबई : अलिबाग आणि मुंबईतील दादर येथील मालमत्तांवर ईडीने टाच आणल्यानंतर शिवसेना खासदार संजय राऊत (Sanjay Raut) यांनी प्रतिक्रिया देतानाच, भाजपवर हल्लाबोल केला होता. त्यानंतर काही वेळानेच त्यांनी 'असत्यमेव जयते' असं ट्विट (Tweet) केलं होतं. या ट्विटला चार तास उलटत नाही तोच, राऊत यांनी दुसरं ट्विट केलं आहे. 'जय महाराष्ट्र' असं त्यांनी ट्विटमध्ये म्हटलं असून, एका शायरीद्वारे त्यांनी विरोधकांना सूचक इशारा दिला आहे.

ईडीच्या कारवायांवर शंका उपस्थित करून आरोपांच्या फैरी झाडणारे शिवसेना खासदार संजय राऊत यांच्यावरच आज, मंगळवारी ईडीने मोठी कारवाई केली. त्यांच्या अलिबागमधील मालमत्ता आणि मुंबईच्या दादरमधील फ्लॅटवर जप्तीची कारवाई केली. या कारवाईनंतर संजय राऊत यांनी प्रतिक्रिया दिली होती. मनी लाँड्रिंगमधील एक रुपया जरी खात्यात आला असेल तर, माझी सर्व मालमत्ता भाजपला दान करेन, असं थेट आव्हानच त्यांनी दिलं होतं. त्यानंतर काही वेळातच त्यांनी ट्विट केलं होतं. यात त्यांनी 'असत्यमेव जयते' असं नमूद केलं होतं.

संजय राऊत यांच्यावरील कारवाईनंतर राजकीय वर्तुळातून प्रतिक्रिया उमटल्या. महाविकास आघाडीमधील अनेक नेत्यांनी भाजपवर (BJP) टीकास्त्र सोडलं होतं. तर, भाजपच्या काही नेत्यांनी ईडीच्या कारवाईचं स्वागत करतानाच, राऊत यांच्यावर निशाणा साधला होता. आता पुन्हा त्यांनी एक ट्विट केलं आहे. यात त्यांनी 'जय महाराष्ट्र' असं नमूद केलं असून, यातून त्यांनी सूचक इशारा दिला आहे.

Edited By - Jagdish Patil