साक्षी यादव, साम प्रतिनिधी

माजी पोलीस अधिकारी सचिन वाझे यांना एनआयए विशेष न्यायालयाकडून जामीन मंजूर करण्यात आलाय. मनसुख हिरेन हत्या आणि अँटिलिया स्फोटक प्रकरणातील एनआयएच्या गुन्ह्यात वाझेंना हा जामीन देण्यात आला आहे. समोर आलेल्या माहितीनुसार, वाझेने या प्रकरणात साडेपाच वर्षांचा कालावधी तुरुंगात घालवल्याने हा मुद्दा लक्षात घेऊन कोर्टाने त्याला जामीन दिलाय.

जामिनासाठी १ लाख रुपयांचा वैयक्तिक बाँड आणि स्थानिक जामीनदाराची अट

सचिन वाझेंना पासपोर्ट असल्यास तो एनआयएकडे जमा करण्याचे निर्देश न्यायालयाने दिले आहेत. तसेच या प्रकरणातील महत्त्वाच्या साक्षीदारांचे पुरावे नोंदवले जाईपर्यंत वाझेंना मुंबई, नवी मुंबई, रायगड, ठाणे आणि पालघर या जिल्ह्यांच्या हद्दीत राहता किंवा प्रवेश करता येणार नाही.

कोर्टात सुनावणीसाठीच मुंबईत येण्याची परवानगी

सुनावणीच्या निश्चित तारखेला न्यायालयात हजर राहण्यासाठी वाझेंना या जिल्ह्यांमध्ये येता येईल. मात्र, कोर्टाची कार्यवाही पूर्ण झाल्यानंतर त्यांनी संबंधित जिल्ह्यांची हद्द तातडीने सोडून निर्धारित निवासस्थानी परत जाणे बंधनकारक असेल.

वाझे १३ मार्च २०२१ पासून कोठडीत

सचिन वाझे हे १३ मार्च २०२१ पासून कोठडीत आहेत. एनआयएकडून या प्रकरणात १४ हजारांहून अधिक पानांचे आरोपपत्र, ३२० साक्षीदार आणि मोठ्या प्रमाणावर इलेक्ट्रॉनिक व डिजिटल पुरावे असल्याचे त्यांच्या जामीन अर्जात नमूद करण्यात आले..

न्यायालयाचे निरीक्षण

न्यायालयाने जामीन अर्ज मंजूर करताना आरोपपत्रातील पुरावे, यूएपीएअंतर्गत आरोप, मनसुख हिरेन हत्या प्रकरणातील परिस्थितीजन्य पुरावे आणि इतर आरोपींना मिळालेला जामीन यांचा विचार केला. न्यायालयाने नमूद केले की आरोप निश्चित करण्यासाठी आवश्यक असलेला ‘प्रथमदर्शनी’ निकष आणि जामीन नाकारण्यासाठी आवश्यक असलेला निकष पूर्णपणे समान नसतो.