बदलापूर - जागतिक पर्यावरण दिनाचं औचित्य साधून बदलापूर (Badlapur) शहरात रानमेवा महोत्सव आयोजित करण्यात आला आहे. या महोत्सवात रानातला मेवा थेट शहरात उपलब्ध करून देण्यात आला आहे. शेतमाल थेट ग्राहकांपर्यंत पोहोचवणारी शेतीजन्य संस्था आणि आमदार किसन कथोरे मित्रमंडळ यांच्या संयुक्त विद्यमाने हा रानमेवा महोत्सव आयोजित करण्यात आला.

हे देखील पाहा -

यामध्ये निरनिराळ्या जातीचे आंबे, जांभळं, करवंदं आणि लोणच्याच्या आंब्यांचा समावेश आहे. हा रानमेवा बदलापूर शहरात फिरत्या पद्धतीने विक्रीसाठी उपलब्ध करून देण्यात आला आहे. या संकल्पनेला बदलापूरकरांनी चांगला प्रतिसाद दिला. शेकडो नागरिकांनी आदिवासींकडून रानमेवा खरेदी केला.

रविवारीसुद्धा बदलापूर आणि अंबरनाथमध्ये हा रानमेवा महोत्सव होणार आहे. नैसर्गिकरित्या पिकणारा शंभर टक्के सेंद्रीय आणि पौष्टिक रानमेवा आरोग्यासाठी उत्तम असून त्याची विक्री करणाऱ्या मुरबाडमधील आदिवासींना शहरात विक्रीसाठी व्यासपीठ निर्माण करून देण्यासाठी हा उपक्रम राबवल्याचं आमदार किसन कथोरे यांनी सांगितलं.