मोठा गाजावाजा करून २ महिन्यांपूर्वी उद्घाटन करण्यात आलेला आणि जागातला सर्वात रूंद बोगदा असलेल्या मिसिंग लिंकमध्ये पहिल्याच पावसात दरड कोसळल्यानं सरकार विरोधकांच्या निशाण्यावर आलंय.त्यात विधानसभेत मुख्यमंत्र्यांनी मिसिंग लिंकवर बोलताना महाराष्ट्राची बदनामी कराल तर सोडणार नाही असा सज्जड दमच भरला. मात्र यावर तीव्र आक्षेप घेत राज ठाकरेंनी मुख्यमंत्र्यांवर जोरदार हल्ला चढवलाय.

एवढंच नव्हे तर मिसिंग लिंकच्या दुर्घटनेला नैसर्गिक घटना म्हणणाऱ्या गिरीश महाजनांचाही राज ठाकरेंनी समाचार घेतलाय.

दरम्यान ठाकरेंनी महायुतीवर निशाणा साधल्यानं भाजप नेत्यांनीही पलटवार केलाय.

पावसाच्या सुरुवातीलाच 7 हजार कोटींच्या मिसिंग लिंक प्रकल्पाला गळती लागल्यानं विरोधकांना आयतं कोलीत मिळालयं...मात्र अधिवेशनात विरोधकांमध्ये सरकारला घेरण्याची कोणतीही रणनीती दिसून आली नाही. उलट विधानभवनाच्या बाहेर राज ठाकरेंनी सर्वाधिक आक्रमक भूमिका घेत सरकारला चांगलंच धारेवर धरलंय. त्यामुळे मिसिंग लिंकच्या मुद्यावरून मनसे विरूद्ध भाजप असाच सामना रंगण्याची शक्यता आहे.