पुणे: मनसे अध्यक्ष राज ठाकरे पुण्यामध्ये होते. काल त्यांनी हनुमान जयंतीची महाआरती पुण्यामध्ये केली. आज त्यांनी एक पत्रकार परिषद घेतली. ते काय बोलतात याकडे सर्वांचे लक्ष होते. आज देशभरातल्या सर्वांना सांगणे आहे की भोंग्यांचा विषय हा धार्मिक विषय नाही तर हा सामाजिक विषय आहे असे राज ठाकरे म्हणाले. राज ठाकरे आपल्या भोंग्यांविरोधात घेतलेल्या भूमिकेवरती ठाम आहेत. त्यांनी देशातील हिंदूंना तयार राहण्याचे आवाहन केले आहे. ३ तारखेपर्यंत रमजान असल्याने आम्ही काही करणार नाही. त्यानंतर आम्ही ज्या मशिदीवरती भोंगे वाजतील त्या मशिदीसमोर आम्ही आमच्या आरत्या लावणार असेही राज ठाकरे म्हणाले.

राज ठाकरेंनी पुण्यामध्ये दोन मोठ्या घोषणा केल्या आहेत. १ तारखेला म्हणजेच महाराष्ट्र दिनी औरंगाबादमध्ये जाहीर सभा घेणार आहेत. आणि ५ तारखेला सर्व सहकाऱ्यांसोबत अयोध्येला जाणार अशा दोन घोषणा राज ठाकरेंनी केल्या आहेत. हनुमान चालीसा लावणाऱ्या काही मनसे कार्यकर्त्यांवर पोलीस प्रशासनाने कारवाई केली आहे. त्यावर बोलताना राज ठाकरे म्हणाले ''सर्व मशिदींवरील लाऊडस्पिकर अनधिकृत आहेत तर आमच्या मुलांचे काम कसे अनधिकृत''. आपण सुप्रीम कोर्टाचे आदेश पाळत नाही आहोत. देशापेक्षा धर्म मोठा नाही होऊ शकत हे आपण समजणार आहोत का नाही असेही राज ठाकरे म्हणाले.

Edited By: Pravin Dhamale