Mumbai News : मागील ३-४ दिवसांपासून राज्यात अनेक भागांत मुसळधार पावसाने हजेरी लावली आहे. राज्यातील अनेक भागांत पूरसदृश स्थिती आहे. आज राज्यातील ५ जिल्ह्यांना रेड अलर्ट देण्यात आला आहे. त्यानुसार पावसाची अनेक भागात जोरदार बॅटिंग सुरु आहे. मुंबई आणि आजूबाजूच्या परिसरातही पावसाची संततधार सुरु आहे.

उद्या राज्यातील पाऊस कसा असेल याचा अंदाजही हवामान विभागाने दिला आहे. उद्या पालघर आणि पुणे जिल्ह्याला उद्या रेड अलर्ट देण्यात आला आहे. तर मुंबई-ठाण्यासह एकूण ८ जिल्ह्यांमध्ये अतिमुसळधार पावसाचा अंदाज हवामान विभागाने दिला आहे. (Maharashtra News)

रेड अलर्ट

हवामान विभागाच्या अंदाजानुसार, पुणे आणि पालघरला रेड अलर्ट देण्यात आलं आहे. मागील दोन दिवसांपासून दोन्ही जिल्ह्यामध्ये जोरदार पाऊस (rain) बरसत आहे. उद्याही दोन्ही जिल्ह्यात अतिवृष्टीचा इशारा देण्यात आला आहे. पालघरमधील शाळांनाही दोन दिवसांपासून सुट्टी देण्यात आली आहे.

8 जिल्ह्यांना ऑरेंज अलर्ट

तर एकूण आठ जिल्ह्यांना ऑरेंज अलर्ट देण्यात आला आहे. ठाणे, मुंबई, रायगड, रत्नागिरी, सातारा, चंद्रपूर, गडचिरोली, वाशीम या जिल्ह्यांमध्ये अतिमुसळधार पावसाचा अंदाज हवामान विभागने वर्तवला आहे.