Mangesh Chivte withdraws nomination from Pune teacher constituency, : पुणे शिक्षक आणि पदवीधर मतदारसंघातील महायुतीमधील मोठी बंडखोरी अखेर शमली आहे. उपमुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या मध्यस्थीनंतर दोन्ही मतदारसंघांतील बंडखोर उमेदवारांनी आपले अर्ज मागे घेतले आहेत. त्यामुळे महायुतीतील मतविभाजनाचा मोठा धोका टळला असून, या दोन्ही जागांवर आता भाजपचे अधिकृत उमेदवार रिंगणात असणार आहेत.

पुण्यात रात्रीत काय घडलं?

शिवसेनेचे (शिंदे गट) नेते मंगेश चिवटे यांनी पुणे शिक्षक मतदारसंघातून महायुतीविरोधात बंडखोरी करत उमेदवारी अर्ज दाखल केला होता. मात्र, उपमुख्यमंत्री एकनाथ शिंदे यांनी फोनवरून माघार घेण्याचे थेट आदेश दिल्यानंतर चिवटे विधान भवनात पोहोचले आणि त्यांनी आपला अर्ज मागे घेतला.

शिवसेनेत पक्षाचा आदेश हा शेवटचा मानला जातो. एकनाथ शिंदे साहेबांनी अर्ज मागे घ्यायला सांगितला, म्हणून मी तो मागे घेतला आहे. मी पक्षावर किंवा युतीवर अजिबात नाराज नाही, अशी प्रतिक्रिया चिवटेंनी दिली.

पदवीधर मतदारसंघातून भैय्या मानेंचा युटर्न:

पदवीधर मतदारसंघातून अपक्ष अर्ज भरलेले राष्ट्रवादी काँग्रेसचे (अजित पवार गट) नेते प्रताप उर्फ भैय्या माने यांनीही निवडणुकीतून माघार घेतली आहे. मुख्यमंत्री देवेंद्र फडणवीस यांच्यासोबत झालेल्या चर्चेनंतर त्यांनी हा निर्णय घेतला.

मी मुळात महायुतीकडूनच तिकिट मागितले होते, पण राजकीय समीकरणांमुळे ही जागा भाजपकडे गेली. अपक्ष लढल्यास महायुतीचे नुकसान झाले असते. कार्यकर्त्यांची इच्छा होती, पण युतीचा धर्म पाळत मी कोणत्याही दबावाशिवाय माघार घेत आहे, अशी प्रतिक्रिया भैय्या माने यांनी दिली.

महायुतीचे अधिकृत उमेदवार कोण?

बंडखोरांनी माघार घेतल्यामुळे पुण्यातील दोन्ही जागांवर महायुतीचा मार्ग मोकळा झाला आहे. पुणे शिक्षक मतदारसंघातून कौस्तुभ मुरलीधर गावडे (भाजप) आणि पुणे पदवीधर मतदारसंघातून डॉ. स्मिता योगेश जाधव (भाजप) हे अधिकृत महायुतीचे उमेदवार असतील. चिवटे आणि भैय्या माने यांच्या या बंडखोरीच्या माघारीमुळे महायुतीमधील मतविभाजनाचे गणित सुटले आहे. निवडणुकीच्या तोंडावर महायुतीला मोठा दिलासा मिळाला आहे.