Pune Latest News : पुण्यातील बेलबाग चौकाजवळच सिटी पोस्ट कार्यालय आहे. मैलापाणी वाहिन्यांबाबत तक्रारी आल्याने महापालिकेकडून संबंधित वाहिन्या दुरूस्तीचे काम सुरू होते. मात्र या दुरुस्तीसाठी गेलेला महापालिकेचा ट्रक थेट २५ फूट खोल खड्ड्यात कोसळल्याचा धक्कादायक प्रकार घडला आहे. शुक्रवारी दुपारी चारच्या सुमारास ही घटना घडली असून सुदैवाने यात कोणालाही दुखापत झाली नाही. मात्र सध्या महापालिकेच्या या कामाची शहरात जोरदार चर्चा सुरू झाली आहे.

बेलबाग चौक परिसरात मैलापाणी वाहिन्यांबाबत काही दिवसांपासून अनेक तक्रारी येत होत्या. त्यामुळे महापालिकेने आज संबंधित वाहिन्या दुरूस्तीचं काम सुरू केलं होतं. शुक्रवारी दुपारी चारच्या सुमारास महापालिकेकडून मैलापाणी वाहिनी दुरूस्तीसाठी ठेकेदाराचा ट्रक व कामगारांना या भागात पाठवण्यात आलं होतं. ट्रक आणि कामगार सिटी पोस्ट कार्यालयात पोहोचले आणि चेंबरमधील कामाला सुरुवात केली. बाजूलाच महापालिकेचा ट्रक थांबला होता.

काम सुरू असताना अचानक ट्रक थांबलेल्या ठिकाणची जमीन खचली आणिल ट्रक सरळ २५ फूट जमिनीत गेला. ट्रकचा केबीनचा भाग वगळता संपूर्ण ट्रक जमीनीत गाडला गेला. ट्रक चालकाने प्रसंगावधान राखत ट्रकमधून बाहेर उडी घेतल्याने त्याचा जीव वाचला.

ट्रकखाली मोठा खड्डा पडला होता आणि त्यात मोठ्या प्रमाणात पाणीही साचलं. त्यामुळे संपूर्ण ट्रक पाण्यात बुडाला. अखेर हा ट्रक बाहेर काढण्यासाठी अग्नीशमन दलाला पाचारण करावं लागलं. काही वेळातच अग्निशामक दलाचे जवान घटनास्थळी दाखल झाले आणि खड्ड्यात पडलेल्या ट्रक काढण्याचं काम सुरू केलं आहे, अशी माहिती अग्निशामक दलाचे अधिकारी सुहास जाधव यांनी दिली.