Pune drug racket bust : पुण्यात ‘एमडी’ ड्रग्जचा कारखाना उघडण्याचा कट उधळण्यात आला आहे. सव्वा कोटींच्या मुद्देमालासह आठ जणांना अटक करण्यात आली आहे. थेट ड्रग्स तयार करण्याचा कारखाना सुरू करण्याच्या तयारीत असलेल्या एका आंतरराज्य टोळीचा वाघोली पोलिसांनी पर्दाफाश केला. या प्रकरणी पोलिसांनी मुख्य सूत्रधारासह आठ आरोपींना अटक केली. पोलिसांनी आरोपींकडून २२५ ग्रॅम एमडी ड्रग्ज आणि आलिशान मोटारी असा एक कोटी १६ लाख रुपयांचा मुद्देमाल जप्त केला आहे.

याप्रकरणी सुमीत अशोक घुले (वय ४१), अनिस शम्मू सय्यद (वय २८), हरी उत्तम उफाडे (वय ३५), प्रतीक उर्फ सोन्याबापू होले (वय ३२), ऋषिकेश उर्फ राम यनभर (वय २९), रामनिवास रानूराम बिश्नोई (वय २५), आकाश अशोक ढवळे (वय २६) आणि बिपिनकुमार श्रीरामसागर पंडित (वय ५४) अशी अटक करण्यात आलेल्या आरोपींची नावं आहेत.

पोलिसांनी दिलेल्या माहितीनुसार, पुण्यातील केसनंद येथून अनिस सय्यद आणि हरी उफाडे यांना पाच ग्रॅम एमडीसह पोलिसांनी ताब्यात घेतले होते. या गुन्ह्याचा तपास करत असताना मुख्य सूत्रधार सुमीत घुले हा असल्याचे समोर आल्यानंतर पोलिसांनी तपास बदलला. पोलिसांनी अखेर त्याला अहमदाबाद येथून अटक केली.

तपासादरम्यान आरोपी घुले हा आकाश ढवळेच्या मदतीने पुणे शहरात आणि ग्रामीण भागात ड्रग्जची विक्री करत होता. विशेष म्हणजे, कुरकुंभ ड्रग्ज प्रकरणातील आरोपी बिपिनकुमार पंडित हा सध्या जामिनावर बाहेर होता. त्याच्या मदतीने ग्रामीण भागात एमडी बनविण्याचा कारखाना सुरू करण्याची या टोळीची तयारी होती. मात्र, त्यापूर्वीच पोलिसांनी हे रॅकेट उद्ध्वस्त केले. आरोपींकडून ४५ लाख ६० हजार रुपये किमतीचे २२५ ग्रॅम एमडी ड्रग्ज जप्त करण्यात आले आहे