पुणे : मॉर्निंग वॉकसाठी घराबाहेर पडलेल्या एका तरुणाचा दुर्दैवी अपघातामध्ये मृत्यू झाला. या अपघाताचे काही धक्कादायक फोटो देखील समोर आले होते. घटनास्थळी कोणतेही वस्तू न सापडल्याने मृत तरुणाची अद्याप ओळख पटलेली नव्हती. हा अपघात कसा झाला याचा शोध पोलीस घेत होते. अखेर पुण्यातील हिट अँड रन प्रकरणात कारचालकाला तरुणाला पुणे पोलिसांनी अटक केली आहे. अपघातानंतर चारचाकी चालकाने घटनास्थळावरून पळ काढला होता. समीर गणेश कड असं या आरोपीचं नाव असून त्याला पोलिसांनी अटक केली आहे. तसेच मृत तरुणाची ओळख देखील पटलेली आहे.

पोलिसांनी दिलेल्या माहितीनुसार, हा अपघात न्याती ईबोनी सोसायटीजवळ, उंड्री येथे घडला. सुजितकुमार बसवंतप्रसाद सिंग असं अपघातात मृत्युमूखी पडलेल्या तरुणाचं नाव आहे. पोलिसांनी तात्काळ त्या चालकाचा शोध घेण्यास सुरुवात केली. आजूबाजूचे ठिकाणचे सीसीटीव्ही फुटेजची पाहणी केली असता एक टाटा नेक्सॉन ग्रे रंगाची गाडी घटनास्थळावरुन जाताना दिसली.

गाडीचा नंबर एमएच १२ एक्सएच ५४३४ असा असल्याचं निष्पन्न झाल्यानंतर, अवघ्या १० तासात या गाडी मालकाचा शोध घेऊन त्याला ताब्यात घेतलं. अधिक तपास केला असता आरोपीने गाडीचे दोन्ही बाजूची नंबर प्लेट काढून ती औताडेवाडी पुणे येथील निर्जनस्थळी लपवून ठेवली होती.