अक्षय बडवे, पुणे

पुण्यात बनावट नोटांचे प्रकरण समोर आले आहे. बनावट नोटांद्वारे एका तरुणाला पोलिसांनी अटक केली आहे. रात्रीच्या अंधाराचा फायदा घेऊन हा तरुण या नोटांचा चलनामध्ये वापर करत होता. या तरुणाकडून पोलिसांनी १ लाखांपेक्षा जास्त पैसे जप्त केले आहेत. निलेश विरकर असं या तरुणाचे नाव असून सहकारनगर पोलिसांनी त्याच्याविरोधात कारवाई केली आहे.

मिळालेल्या माहितीनुसार, सहकारनगर पोलिस ठाण्याच्या हद्दीत पेट्रोलींग करत असताना पुणे -सातारा रोडवरील प‌द्मावती बसस्टॉपसमोर एक व्यक्ती गडबडीने स्वारगेटचे दिशेने जाताना पोलिसांन दिसला. पोलिसांना या तरुणाच्या हालचालींवर संशय आला. त्यामुळे त्यांनी त्याचा पाठलाग केला आणि त्याला थांबवले. त्याच्याकडे त्याचं नाव विचारले असता त्याने तो चिंचवडमध्ये राहत असल्याचे सांगितलं आणि गडबडीत निघून जाण्याचा त्याने प्रयत्न केला

पोलिसांनी या तरुणाकडे अजून चौकशी केली असता तो त्याच्या खिशात काहीतरी लपवत असल्याचे पोलिसांना दिसले. त्याची हालचाल संशयास्पद असल्याचे पोलिसांच्या निदर्शनास आहे. त्यांनी त्याचे खिसे तपासले असता त्यामध्ये त्यांना बनावट नोटा असल्याचे निष्पन्न झाले. रात्रीच्या अंधाराचा फायदा घेत हा तरुण या नकली नोटा चलनात वापरत होता. त्याने पोलिसांनी ही माहिती दिली

पोलिसांनी या तरुणाला ताब्यात घेतले. निलेश विरकर असं या तरुणाचे नाव असून सहकारनगर पोलिसांनी त्याच्याविरोधात गुन्हा दाखल करत त्याला अटक केली. आरोपीकडून पोलिसांनी १ लाख २५ हजारांच्या ५०० रुपयांच्या एकूण २५० नकली चलनी नोटा जप्त केल्या. यामागे रॅकेट सक्रिय आहे का याचा तपास सुरू आहे.