नितीन पाटणकर, साम टीव्ही, प्रतिनिधी

Pune Police Attack : पुण्यातील गुन्हेगारीचे प्रमाण दिवसेंदिवस वाढत आहे. वाहतूक पोलिसांवर एकाने प्राणघातक हल्ला केल्याची घटना पुण्यात घडली आहे. या घटनेमुळे पुण्यात मोठी खळबळ उडाली आहे. हल्ल्यामध्ये वाहतूक पोलीस अधिकारी गंभीर जखमी झाले असून त्यांच्यावर रुग्णालयात उपचार सुरु आहेत.

मिळालेल्या माहितीनुसार, हा प्रकार फुरसुंगीतील भेकराईनगर चौकात घडला. एक व्यक्ती फोनवर बोलत बाईक चालवत होता. तेव्हा तेथील वाहतूक पोलीस हवालदाराने बाईकस्वाराला अडवले. या गोष्टीचा राग बाईकस्वाराला आला आणि त्याने हवालदारावर प्राणघातक हल्ला केला. हल्ला करुन बाईकस्वार पळून गेला.

जखमी वाहतूक पोलीस हवालदाराचे नाव राजेश गणपत नाईक असे आहे. राजेश यांनी बाईक चालवत असताना फोनवर बोलणाऱ्या व्यक्तीला अडवले. यावर संतापलेल्या बाईकस्वाराने राजेश यांच्याशी वाद घातला. रागात त्याने बाईकस्वाराने राजेश यांच्यावर हल्ला केला. त्याने रस्त्यात पडलेला दगड राजेश नाईक यांच्या डोक्यात जोरात घातला.

हल्ला झाल्यानंतर पोलीस हवालदार राजेश नाईक गंभीररित्या जखमी झाले. त्यांना उपचारांसाठी जवळच्या रुग्णालयात दाखल करण्यात आले. त्यांच्यावर सध्या उपचार सुरु आहेत. दरम्यान हल्ला करणारा आरोपी फरार आहे. त्याचा शोध पोलीस घेत असल्याची माहिती समोर आली आहे. या घटनेमुळे पुण्यात पोलीसच सुरक्षित नसल्याचे लोक म्हणत आहेत.