Pune Accident News : पुण्यातून एक दुर्दैवी घटना उघडकीस आली आहे. पुरंदर तालुक्यातील पुणे पंढरपूर मार्गावर दिवे येथे नातवाला शाळेतून घरी घेऊन जात असताना दोन मोटार सायकलची जोरदार धडक झाली. या भीषण अपघातात एका ६३ वर्षीय व्यक्ती आणि त्यांच्या नातवाचा जागेवरच मृत्यू झाल्याची घटना समोर आली आहे. तर दुचाकीवरील तरुण गंभीर जखमी झाला असून त्याच्यावर रुग्णालयात उपचार सुरु आहे. बुधवारी सायंकाळी ही घटना घडली आहे.

गोकुळ धोंडीबा झेंडे( वय ६३) आणि पद्मनाभ झेंडे( वय ४) अशी जागेवर मृत्युमुखी पडलेल्यांची नावे आहेत. गोकुळ झेंडे हे आपल्या नातवाला शाळेतून आपल्या घरी घेऊन येत होते. रस्ता ओलांडत असताना पाठीमागून येणाऱ्या एका दुचाकीने आजोबांच्या दुचाकीला जोरदार धडक दिली. या धडकेत आजोबा आणि नातवाला गंभीर मार लागल्याने नातवाला जागेवरच मृत्यू झाला तर आजोबांना रुग्णालयात नेत असताना मृत्यू झाला.

मिळालेल्या माहितीनुसार, धडक दिलेल्या दुचाकीस्वारांकडे स्पोर्टस बाईक होती त्यामुळे तो वेगात होते. त्यामुळे त्याचे वाहनावरील नियंत्रण सुटले आणि थेट आजोबांच्या गाडीला धडक दिली. या प्रकरणी हडपसर पोलिसांनी दुचाकीस्वार याला ताब्यात घेतले आहे. या घटनेनंतर स्थानिकांच्या संतापाचा भडका उडला. त्यांनी स्पोर्टस बाईक पेटवून दिली. त्यामुळे काही काळ या ठिकाणी तणावाचे वातावरण निर्माण झाले होते. या घटनेमुळे झेंडे कुटुंबावर दुःखाचा डोंगर कोसळला आहे.