अक्षय बडवे, साम टीव्ही

आमचा भाई गेला, आता कोणालाही सोडणार नाही, असा आरडाओरड करत अज्ञात तरुणांनी पुण्यातील जय प्रकाशनगरमध्ये चांगलाच धुमाकूळ घातला. हवेत हत्यारे भिरकावत या गुंडांनी परिसरात उभ्या असलेल्या वाहनांची देखील तोडफोड केली. इतकंच नाही, तर नागरिकांना देखील धमकावण्याचा प्रयत्न केला. या घटनेनं परिसरात भीतीचं वातावरण आहे.

याप्रकरणी पोलिसांनी (Pune Police) ४ अज्ञात आरोपींवर गुन्हा दाखल केलाय. या चारही आरोपींचा शोध घेतला जातोय. येरवडा पोलिसांनी दिलेल्या माहितीनुसार, १७ जुलै रोजी सराईत गुन्हेगार सुधीर चंद्रकांत गवस (वय २५) याचा खून झाला होता.

परिसरात राहणाऱ्या आचार्य कुटुंबासोबत झालेल्या वादातून त्याचा खून (Crime News) झाला होता. या प्रकरणी पोलिसांनी आरोपींना अटक केली होती. यावरून गवसचा भाऊ आणि त्याचे इतर साथीदार चिडून होते. याच रागातून आरोपी प्रकाशनगरमध्ये शिरले.

त्यांनी हातातील कोयते तसेच इतर हत्यारे हवेत भिरकावून परिसरात दहशत माजवण्याचा प्रयत्न केला. यावेळी आरोपींनी रस्त्याच्या कडेला उभारलेल्या वाहनांची देखील तोडफोड सुरू केली. तोडफोडीचा आवाज ऐकून स्थानिक घराबाहेर आले.

त्यांना देखील आरोपींनी धमकावण्याचा प्रयत्न केला. या घटनेमुळे नागरिक चांगलेच धास्तावले असून पोलिसांनी गुंडांचा तातडीने बंदोबस्त करण्याची मागणी केली. याप्रकरणी येरवडा पोलिसांनी आरोपींविरोधात गुन्हा दाखल केला असून त्यांचा कसून शोध घेतला जातोय.