अक्षय बडवे, साम टीव्ही, प्रतिनिधी

Pune News : मध्यप्रदेशमधील इंदौर हे भारतातील सर्वात स्वच्छ शहर आहे. या शहरातील स्वच्छतेचा धडा घेण्यासाठी पुणे महानगरपालिकेचे १०० सफाई कर्मचारी अभ्यास दौऱ्याला जाणार आहेत. या दौऱ्यात महापालिका अधिकारी, कर्मचारी, कसबा मतदार संघातील भाजप कार्यकर्ते, सामाजिक संस्थांचे प्रतिनिधी यांचा समावेश असणार आहे.

पंतप्रधान नरेंद्र मोदी यांच्या उपस्थितीमध्ये मुंबईत राज्यातील सर्व आमदारांसाठी मार्गदर्शक बैठक पार पडली होती. या बैठकीमध्ये मतदारसंघात सर्वोत्तम विकासकामे राबवण्यासाठी अभ्यास दौरे करण्याचा सल्ला पंतप्रधान यांनी आमदारांना दिला होता. या सल्ल्यानुसार, पुण्यातील १०० सफाई कर्मचारी स्वच्छतेचा धडा घेण्यासाठी इंदौरला जाणार आहेत.

गेल्या सात वर्षांपासून स्वच्छ सर्वेक्षणांमध्ये पहिल्या क्रमांकावर इंदौर शहर आहे. क्लीन सिटी म्हणून इंदौरचा उल्लेख केला जातो. तेथे स्वच्छतेसाठी काय केले जाते, कचऱ्याचे व्यवस्थापन आणि नियोजन कसे केले जाते याची माहिती घेण्यासाठी पुणे महापालिका कर्मचारी इंदौरला जाऊन प्रत्यक्षरित्या अध्ययन करणार आहेत.

पुण्यातील कसबा विधानसभा मतदारसंघाचे आमदार हेमंत रासने यांच्यासह महानगरपालिका अधिकारी, कर्मचारी दौऱ्यात सामील होमार आहेत. तर इंदौर स्मार्ट सिटीच्या प्रमुख श्रद्धा तोमर या दौऱ्यात सर्वांचे मार्गदर्शन करणार आहेत. ‘स्वच्छ, सुंदर आणि विकसित कसबा’ अभियानाची अंमलबजावणी करण्यासाठी या दौऱ्याचे आयोजन करण्यात आले आहे.