Kalyani Nagar Pune robbery case latest news : रस्त्याच्या बाजूला शांतपणे उभा राहून फोनवर बोलणाऱ्या एका तरुणाला "रागाने का पाहतोस?" असा जाब विचारत जीवे मारण्याची धमकी देऊन लुटल्याची धक्कादायक घटना पुण्यात घडली आहे. कल्याणीनगर परिसरात १९ ऑगस्ट रोजी घडलेल्या या थरारक प्रकारानंतर येरवडा पोलीस ठाण्यात गुन्हा दाखल करण्यात आला होता.

याप्रकरणी पोलिसांनी परिसरातील तब्बल ८७ सीसीटीव्ही कॅमेऱ्यांचे फुटेज तपासून आणि तांत्रिक विश्लेषण करून हडपसर भागातील दोन सराईत गुन्हेगारांच्या मुसक्या आवळल्या आहेत.मिळालेल्या माहितीनुसार, कल्याणीनगर येथे पीडित व्यक्ती फोनवर बोलत उभी असताना दुचाकीवरून आलेल्या दोन अनोळखी भामट्यांनी त्याला विनाकारण अडवून वाद घातला.

"माझ्याकडे रागाने का बघतोस?" अशी विचारणा करत त्याला जीवे मारण्याची धमकी दिली आणि त्याच्या खिशातील १५ हजार रुपयांची रोख रक्कम जबरीने हिसकावून पसार झाले. घटनेचे गांभीर्य ओळखून येरवडा पोलिसांनी तपास यंत्रणा वेगाने हलवली. घटनास्थळ आणि परिसरातील तब्बल ८७ सीसीटीव्ही फुटेजची बारीक पाहणी केल्यानंतर तसेच तांत्रिक विश्लेषणाच्या आधारे हे आरोपी हडपसर भागातील असल्याची माहिती पोलिसांना मिळाली.

गुप्त बातमीदाराकडून मिळालेल्या माहितीनुसार येरवडा पोलिसांनी हडपसर पोलिसांच्या मदतीने सापळा रचून निखील ऊर्फ दाद्या शशिकांत कांबळे (वय २६) आणि अयान नासीर शेख (वय २२) या दोघांना ताब्यात घेतले. हे दोघेही हडपसर पोलीस ठाण्याच्या दप्तरावरील रेकॉर्डवरील गुन्हेगार असून, त्यांनी कल्याणीनगर येथील ही जबरी चोरी केल्याची कबुली दिली आहे.