सचिन जाधव, पुणे

पुण्यात कोयत्याचा धाक दाखवून सराफाचं दुकान लुटल्याची धक्कादायक घटना समोर आली आहे. चोरट्यांनी सोनं लुटून घटनास्थळावरुन पळ काढला आहे. सदर घटना पुणे सोलापूर रोड मांजरी हद्दीतील शेवाळवाडी येथे काल सायंकाळी साडेपाच वाजण्याच्या सुमारास घडली आहे. पोलीस या घटनेचा तपास घेत असून मांजरी पोलीस ठाण्यामध्ये अज्ञात चोरट्या विरोधात गुन्हा दाखल करण्यात आला आहे.

मिळालेल्या माहितीनुसार, पुणे सोलापूर रोड मांजरी हद्दीतील शेवाळवाडी गावामध्ये रस्त्याच्या कडेला महावीर ज्वेलर्स आहे. या सराफा दुकानात काल सायंकाळी साडे पाच वाजण्याच्या सुमारास चार जण हातामध्ये लांब धारदार कोयते घेऊन,ज्वेलर्सच्या दुकानात घुसले. यावेळेस दुकानांमध्ये केवळ मालक एकटेच होते.

मालक एकटे असल्याचे पाहून दरोडेखोरांनी त्यांना कोयत्याचा धाक दाखवला. कोयता हातात घेऊन दरोडेखोरांनी सराफाला धमकावत दुकानामधील सोन्याचे दागिने गोळा करण्यास सुरूवात केली. हातात लोखंडी हत्यार असल्याने मालकाला आरडाओडा केल्यास जीवे मारू अशी धमकी सुद्धा दिली. घाबरलेला दुकानदार तोंड बंद करून घाबरलेल्या अवस्थेत गप्प बसून राहिला.

मालकाने जरा सुद्धा आरडाओरडा केला नाही. दरम्यान दरोडेखोरांनी दागिने पिशवीत भरले आणि घटनास्थळावरून चौघेही पसार झाले. या घटनेनंतर घाबरलेल्या सराफाने तातडीने पोलीस ठाण्यात तक्रार केली. घडलेली घटना सीसीटीव्हीमध्ये कैद झाली असून पोलीस या घटनेचा तपास करत आहेत.