सागर आव्हाड, साम टीव्ही, प्रतिनिधी

Pune : पुण्याच्या दौंड तालुक्यातील चौफुला येथे कलाकेंद्रामध्ये गोळीबार झाल्याची माहिती समोर आली आहे. पुणे ग्रामीण पोलिसांकडून या माहितीची पृष्टी करण्यात आली आहे. कलाकेंद्रात हवेत गोळीबार झाल्याचे पुणे ग्रामीण पोलिसांनी म्हटले आहे. गोळीबार कुणाकडून करण्यात आला याबद्दल तपास सुरु आहे, असे पोलिसांनी सांगितले आहे.

राष्ट्रवादी शरद पवार गटाचे आमदार रोहित पवार यांनी ट्वीट करत दौंडमध्ये एका कलाकेंद्रात गोळीबार झाल्याची माहिती दिली होती. घटनेची माहिती समोर आल्यानंतर पोलिसांकडून या प्रकरणाचा तपास सुरु करण्यात आला. कलाकेंद्रामध्ये हवेत गोळीबार झाल्याचे तपासात स्पष्ट झाले आहे. दौंडमधील चौफुल्याच्या तीन कला केंद्रांपैकी कोणत्या कला केंद्रामध्ये गोळीबार झाला याबाबत चौकशी सुरु आहे. तपासासाठी चौफुल्याच्या अंबिका कला केंद्रात अप्पर पोलीस अधीक्षक दाखल झाले आहेत.

पुण्याच्या दौंडमधील एका कला केंद्रामध्ये सत्ताधारी आमदाराच्या भावाने राडा घातला आहे. त्या व्यक्तीने अंदाधुंद गोळीबार केला. गोळीबारामध्ये एका तरुणी गंभीररित्या जखमी झाली आहे, अशी माहिती राष्ट्रवादीचे आमदार रोहित पवार यांनी एक्सवर पोस्ट शेअर करत दिली आहे. या एक्स पोस्टनंतर पुणे पोलिसांनी या प्रकरणाची दखल घेतली. या प्रकरणात गोळीबार कोणी केला याचा तपास सुरु पुणे ग्रामीण पोलीस करत आहेत.

दौंडमधील एका कलाकेंद्रात पुण्यातील सत्ताधारी पक्षातील आमदाराच्या भावाने अंदाधुंद गोळीबार करत मोठा गोंधळ घातला. या घटनेत एक तरुणी जखमी झाली आहे. गंभीर बाब म्हणजे, आरोपी कोण आहे, याचा शोध घेण्याऐवजी पोलिस यंत्रणा सत्ताधाऱ्यांच्या दबावाखाली प्रकरण दडपण्याचा प्रयत्न करत असल्याची माहिती समोर आली आहे. दोषींवर कारवाई होणार का? की सत्तेच्या जोरावर त्यांना मोकळं सोडण्यात येणार? कायदा आणि सुव्यवस्थेला आव्हान देणाऱ्या अशा घटनांवर पोलीस प्रशासनाने कोणत्याही राजकीय दबावाशिवाय कठोर कारवाई केली पाहिजे, असे रोहित पवार यांनी म्हटले.