पाहिलंत हा आहे पुण्यातल्या दहीहंडीतला अश्लील धांगडधिंगा. दोन दिवसांपूर्वी डान्सर राधा पाटीलवर गुन्हा दाखल झाल्यानंतर पोलिसांनी आता इतर डान्सर आणि आयोजकांकडे आपला मोर्चा वळवलाय. दहीहंडी उत्सवात अश्लील डान्स करणाऱ्या इतर सात डान्सर्ससह आयोजकांवरही पुणे पोलिसांनी गुन्हा दाखल केलाय. त्यामुळे आतापर्यंत आठ डान्सर्सवर कारवाईचा बडगा उगारण्यात आलाय.

या नाच गाण्याच्या कार्यक्रमाचं आयोजन करणाऱ्या आयोजक आणि मंडळाच्या पदाधिकाऱ्यांवरही कारवाई गुन्ह्याची नोंद करण्यात आलीय. आत्तापर्यंत कोणा विरुद्ध गुन्हा दाखल केलाय ते पाहूया.

डान्सरचा धांगडधिंगा, कारवाईचा बडगा

राधा पाटील

निशा मुंबईकर

शुभांगी थोरात

यांच्यासह आठ नृत्यांगनांविरोधात गुन्हा

आयोजकही गोत्यात

- अष्टविनायक मित्र मंडळ

अध्यक्ष आणि उपाध्यक्ष

- रिस्की बॉईज ग्रुप

अध्यक्ष आणि उपाध्यक्ष

असे कार्यक्रम सादर करण्यापूर्वी रंगभूमी प्रयोग परिनिरीक्षण मंडळाच्या नियमांनुसार प्रमाणपत्र घेणे आवश्यक आहे. नियमांचं पालन न केल्याचंही गुन्ह्यात पोलिसांनी नमूद केलंय. दुसरीकडे ठाण्यातील भाजप नगरसेविका मृणाल पेंडसे यांनी डान्सर गौतमी पाटील आणि कार्यक्रमाच्या आयोजकांविरोधात पोलिसात तक्रार दिलीय. कारण दहीहंडी कार्यक्रमात डान्स करताना गौतमी पाटीलचं प्रेक्षकांसमोर केलेलं विधान वादात सापडलंय. तर डान्सर ऐश्वर्या जाधवनं योग्यता प्रमाणपत्र असतानाही कार्यक्रमासाठी दुसऱ्यांदा परवानगी नाकारल्याचा आरोप केलाय. अनेक ठिकाणी दहीहंडीचे कार्यक्रम आमदारांनी आणि राजकीय पदाधिकाऱ्यांनी आयोजीत केले होते.

दहीहंडीतल्या कार्यक्रमात सर्वांनी डीजेचा ठणठणाट आणि अश्लिलतेचा कळस पाहिला. त्यामुळे महाराष्ट्राच्या संस्कृतीची लक्तरं वेशीला टांगणारे हे अश्लील डान्स कधी थांबणार? पोलीस तर गुन्हे दाखल करतील मात्र आयोजक कधी भानावर येणार? आणि अशा अश्लिल नृत्यांना चाप बसणार का? हे पाहणं महत्वाचं आहे.