>> अक्षय बडवे

Pune Crime News: पुण्यात सध्या गुन्हेगारी घटनांमध्ये वाढ होताना दिसत आहे. येथे कोयता गँगने पुन्हा हैदोस घातला आहे. अंगावर चिखल उडालं म्हणून टोळक्याने थेट कोयत्यांनी वाहनांची तोडफोड केल्याची घटना येथे घडली आहे. याप्रकरणी इजाज मुनीर शेख यांनी हवेली पोलीस ठाण्यात फिर्याद दिली आहे.

मिळालेल्या माहितीनुसार, फिर्यादी हे डोणजे येथील त्याच्या घराजवळ मुख्य रस्त्याच्या कडेला थांबलेला असतान सिंहगडाकडून येणाऱ्या दुचाकीमुळे त्याच्या अंगावर चिखल उडाला. त्यातून इजाज व दुचाकीवरील तरुणांची शाब्दिक बाचाबाची व हाणामारी झाली.  (Latest Marathi News)

यावेळी स्थानिकांनी मध्यस्थी करुन ही भांडणे सोडवली. दुसऱ्या दिवशी तोंडाला रुमाल बांधून, हातात कोयते घेऊन १० ते १२ जण दुचाकींवरुन आले व मोठ्या आवाजात शिवीगाळ करत एका चारचाकी आणि एका मोटारसायकलची तोडफोड केली.

अचानक घडलेल्या या प्रकारामुळे इजाज व त्याच्या घरातील सर्व सदस्य घाबरले होते. तसेच परिसरातही भीतीचे वातावरण निर्माण झाले होते. याप्रकरणी शिवप्रसाद चोरघे यासह इतर १२ जणांच्या विरोधात गुन्हा दाखल करण्यात आला आहे.

दरम्यान, याआधीही जून महिन्यात अशी घटना घडली होती. पोलिसांनी वाहनांची तोडफोड करणाऱ्या सहा जणावर मोक्का अंतर्गत कारवाई केली होती. एका खुनाच्या प्रयत्नाच्या गुन्ह्यातील सराईत गुन्हेगारासह टोळीतील सहा जणांविरुद्ध पोलिसांनी ही कारवाई केली होती. टोळीने कर्वेनगर आणि तळजाई परिसरात वाहनांची तोडफोड करून दहशत निर्माण केली होती. पोलिसांनी धडक कारवाई करत या टोळीतील चार जणांना अटक होती.