अक्षय बडवे, पुणे

टॉयलेटमध्ये जाऊन लघुशंका करणाऱ्यांचा व्हिडिओ मोबाईलमध्ये काढणाऱ्या तरुणाला पकडून नागरिकांनी चांगलाच चोप दिला. या तरुणाविरोधात अलंकार पोलिस ठाण्यात गुन्हा दाखल करण्यात आला असून पोलिसांनी त्याला ताब्यात घेतलं आहे. पुण्यातील कोथरूडमध्ये रविवारी हा किळसवाणा प्रकार घडला. या घटनेमुळे पुण्यात खळबळ उडाली आहे.

मिळालेल्या माहितीनुसार, ही घटना रविवारी संध्याकाळी ७ वाजता घडली. पुण्यातील कोथरूड परिसरातील असलेल्या एका लॉन्समध्ये एक नृत्य महोत्सवाचे आयोजन करण्यात होते. यावेळी एक तरुण स्वच्छतागृहात व्हिडिओ काढत असल्याचे काही जणांनी पाहिले. त्यानंतर चर्चा केल्यानंतर एकच गोंधळ उडाला.

यावेळी पळून जात असलेल्या आरोपीला तेथील कामगारांनी पकडले आणि चोप दिला. घटनास्थळी असलेल्या पोलिसांनी त्याला ताब्यात घेऊन त्याचा मोबाईल तपासला असता तर त्याने महिलांचा नव्हे तर पुरुषांच्या स्वच्छतागृहात लघुशंका करणाऱ्याचा व्हिडिओ काढला असल्याचे दिसून आले.

या तरुणाला संतप्त नागरिकांनी चांगलाच चोप दिला. याबाबत लॉन्समध्ये काम करणाऱ्या एका कामगाराने पोलिसात फिर्याद दिली. यावरून मंगेश जवाहिरे (३५ वर्षे) या तरुणाविरोधात अलंकार पोलिस ठाण्यात गुन्हा दाखल करण्यात आला. या तरुणाने असे कृत्य का केले याबाबत पोलिस तपास करत आहेत.