पुणे: राज्याचे उपमुख्यमंत्री आणि पुण्याचे पालकमंत्री अजित पवार यांनी आज कोरोना आढावा बैठक घेतली आहे. त्यात त्यांनी अनेक गोष्टी सुरु करण्याचा निर्णय घेण्यात आला आहे. पुणेकरांसाठी अतिशय आनंदाची बातमी म्हणजे जलतरण तलाव सुरु करण्यास प्रशासनाने परवानगी दिली आहे. दोन डोस घेतलेले नागरिक आणि स्पर्धांसाठी तयारी करणारे खेळाडू यांनाच जलतरण तलावात प्रवेश असणार असल्याची माहिती अजित पवार यांनी दिलेली आहे. पुणे जिल्ह्यातील पर्यटन स्थळे सुरू होणार, गर्दी अधिक झाली तर निर्णय घेऊ असेही पवार म्हणाले.

त्याचबरोबर उद्याने सकाळच्या सत्रात सुरु राहणार असल्याचीही माहिती अजित पवारांनी (Ajit Pawar) दिली आहे. पुणे मनपा हद्दीतील उद्याने सकाळच्या सत्रात सुरू राहतील आणि याबाबतचे वेळापत्रक लवकरच जाहीर केले जाईल असे अजित पवारांनी सांगितले आहे. रुग्णसंख्या अधिक असली तरी रुग्णालयात दाखल होणाऱ्यांची संख्या कमी आहे. दरम्यान राज्यातील शाळा स्थानीक परिस्थीती पाहून सुरु करण्याला शिक्षण विभागाने परवानगी दिलेली आहे. त्याच अनुषंगाने जिथे रुग्णसंख्या कमी आहे, तिथे शाळा सुरु करण्याचा निर्णय घेण्यात आलेला आहे. पुण्यातील शाळा आणि महाविद्यालये बंदच राहणार असल्याचा निर्णय घेण्यात आला आहे.

Edited By: Pravin Dhamale