अक्षय बडवे, साम टिव्ही

पुणे : राज्यात दिवसेंदिवस गुन्हेगारीचं प्रमाण वाढत चाललं आहे. हत्या, आत्महत्या, कोयता गँग आणि दरोडा अशा अनेक प्रकारच्या घटना दररोज घडताना दिसत आहेत. काही दिवसांपूर्वी हिंजवडीमधील आयटी पार्कमध्ये एका २५ वर्षीय तरुणीने इमारतीवरुन उडी घेत आत्महत्या केली होती. आत्महत्येपूर्वी तिने चिठ्ठी लिहिली होती की, सॉरी! माझी जगायची इच्छा संपली', असं लिहित तिनं आपलं आयुष्य संपवलं होतं. या घटनेला महिना उलटत नाही तोवर पुण्यात दुसरी घटना समोर आली आहे. आंबेगाव बुद्रुक भागात एका महिलेनं आपल्या सहा वर्षीय चिमुलक्यासह इमारतीच्या पाचव्या मजल्यावरुन उडी घेत आत्महत्या केलीय. दुर्दैवी घटनेत दोघांचाही जागीच मृत्यू झाला आहे.

मिळालेल्या प्राथमिक माहितीनुसार, आत्महत्या केलेल्या महिलेचं नाव मयुरी देशमुख असं आहे. पुण्यातील आंबेगाव बुद्रुक परिसरातील कल्पक सोसायटीमध्ये आज संध्याकाळी ६ वाजता ही घटना घडली. कल्पक सोसायटी येथे देशमुख दाम्पत्य राहतात. मयुरी तिच्या सहा वर्षांच्या चिमुरड्यासह इमारतीच्या पाचव्या मजल्यावर गेली आणि तिने तिथून खाली उडी मारली. उंचावरून पडल्याने दोघांचाही जागीच मृत्यू झाला. धक्कादायक बाब म्हणजे, मयुरीने देखील आत्महत्येपूर्वी चिठ्ठी लिहिली आहे. त्यात म्हटलं आहे की, 'नंदेच्या त्रासाला कंटाळून मी आत्महत्या करत आहे'. ही चिठ्ठी पोलिसांना मिळाली असून पोलीस घटनास्थळी दाखल झाले आहेत. दरम्यान, या धक्कादायक घटनेबाबत गुन्हा दाखल करण्याची प्रक्रिया सुरु आहे.