सचिन जाधव, पुणे

एकीकडे जगभरात सरत्या वर्षाचा निरोप घेऊन, येणाऱ्या वर्षाच्या स्वागतासाठी अवघ जग उत्साहात आहे. झालं गेलेलं मागे विसरतं एक पाऊल नवीन गोष्टींकडे वळवण्यासाठी मनाची तयारी करून पुढे जाण्यासाठी सर्वजण सज्ज झाले आहेत. तर दुसरीकडे, पुण्यात नववर्षाच्या पूर्वसंध्येला हृदयद्रावक घटना घडली आहे. भोर - पुणे मार्गावर कार आणि दुचाकीची जोरात धडक झाली. या धडकेत दुचाकीवरील माय लेकांचा मृत्यू झाला आहे. धक्कादायक म्हणजे अपघात झाला त्यावेळेस कार चालक मद्यधुंद अवस्थेत असल्याचे समजते आहे. याप्रकरणी पोलिसांनी कार चालकाला ताब्यात घेतले आहे.

मिळालेल्या माहितीनुसार, नंदा लक्ष्मण धावले आणि अमृत लक्ष्मण धावले असं अपघातात मृत्यू झालेल्या आई आणि मुलाचं नाव आहे. अमृत धावले आणि त्याची आई नंदा धावले हे दोघेही पुण्यातील भोर तालुक्यातील तेलवडी गावात आपल्या कुटुंबियांसह राहतं होते. आज दुपारी २ वाजताच्या सुमारास दोघे मायलेक शेतात जाण्यासाठी निघाले. पण पुढे जाऊन वाटेत काळ उभा असेल याची जरा सुद्धा कल्पना नव्हती.

अमृत आणि नंदा धवले हे दोघेही शेतात जात असताना भोर - पुणे मार्गावरील कासुर्डी गावाच्या हद्दीत समोर येणाऱ्या कारने त्यांच्या दुचाकीला जोरदार धडक दिली. अपघाताचा मोठा आवाज झाल्याने नागरिकांनी तात्काळ घटनास्थळी धाव घेतली. आणि नंदा आणि त्यांचा मुलगा अमृत या दोघांनाही तात्काळ जवळच्या रुग्णालयात दाखल केले.

मात्र उपचारांपूर्वी त्यांचा मृत्यू झाला. धक्कादायक म्हणजे अपघातावेळी अपघात झालेल्या कारमधील चालक मध्यधुंद अवस्थेत असल्याची प्राथमिक माहिती मिळाली आहे. याप्रकरणी भोरच्या राजगड पोलिसांनी अधिक तपास सुरू केला असून कार चालकाला पोलिसांनी ताब्यात घेतले आहे. नव्या वर्षाच्या स्वागतापूर्वीच झालेल्या या घटनेने धावले कुटुंबियांवर दुःखाचा डोंगर कोसळला आहे.