पुण्यात अपघाताच्या घटनेत दिवसेंदिवस वाढत होताना दिसत आहे. काही दिवसांपूर्वी पाण्याच्या टँकरच्या धडकेत एका दुचाकीस्वार तरुणीचा मृत्यू झाला होता. त्यानंतर आज शनिवारी पुन्हा एकदा अपघाताची घटना घडली आहे. पुण्यातील मार्केटयार्ड गंगधाम चौकात झालेल्या अपघातात 40 वर्षीय व्यक्तीचा जागीच मृत्यू झाला आहे.

पुण्यातील गंगाधाम–बिबेवाडी मार्गावर भीषण अपघाताची घटना घडली. भरधाव वेगाने येणाऱ्या पाण्याच्या टँकरने दुचाकीस्वाराला जोरदार धडक दिली. त्यात त्याचा मृत्यू झाला आहे. या अपघातात दुचाकीस्वार अनिल अल्हाट (वय ४०) यांचा जागीच मृत्यू झालेल्या व्यक्तीचे नाव आहे. अपघातानंतर त्यांना तातडीने जवळच्या रुग्णालयात हलवण्यात आले. मात्र डॉक्टरांनी त्यांना मृत घोषित केले.

पुण्यात भरधाव धावणाऱ्या वॉटर टँकरमुळे वारंवार अपघात होत असून हा प्रश्न दिवसेंदिवस गंभीर बनत चालला आहे. यामुळे परिसरातील रहिवाशांमध्ये भीतीचे वातावरण निर्माण झाले आहे. नागरिकांनी प्रशासनाकडे वारंवार तक्रारी करूनही ठोस उपाययोजना होत नसल्याचा आरोप केला जात आहे. या घटनेनंतर पुन्हा एकदा टँकरच्या वेगावर नियंत्रण,नियमांचे काटेकोर पालन आणि वाहतूक व्यवस्थेवर कडक कारवाई करण्याची मागणी जोर धरत आहे. टँकर चालकाला ताब्यात घेतले असून अधिक तपास पोलीस करत आहेत.

तत्पूर्वी, शहरात पाण्याच्या टँकरमुळे अपघात वाढल्याच्या पार्श्वभूमीवर नागरिकांची बैठक देखील पार पडली. पुण्यातील कोंढवा, एनआयबीएम, उंड्री, पिसोळी भागात उंच इमारती आहेत. परंतु त्यांना पायाभूत सुविधा नसताना इमारतींच्या बांधकामांना परवानगी कशी दिली? असा सवाल बैठकीत विचारण्यात आला.

या अपघातामुळे नागरिकांचा नागरिकांचा बळी जात असल्याचे नागरिकांनी अधोरेखित केले. पाणी प्रश्न सोडवण्यासाठी महापालिका आयुक्तांनी गांभीर्याने लक्ष द्यावे. आम्हाला न्याय न मिळाल्यास न्यायालयात याचिका दाखल करणार आहोत,असे सामाजिक कार्यकर्ते राज सिंग यांनी सांगितले.