• पुण्यात भीषण अपघाताची घटना

• भीमाशंकर मार्गावर कार आणि दोन रिक्षांची भीषण धडक

• भीमाशंकर दर्शनाला गेलेले १२ भाविक जखमी

• अपघातात चार जणांची प्रकृती चिंताजनक

रोहिदास गाडगे, शिरूर

पुणे जिल्ह्यात भयंकर अपघाताची घटना घडली. कार आणि दोन रिक्षांची जोरदार धडक झाली. या भीषण अपघातामध्ये १२ जण गंभीर जखमी झालेत. यामधील ४ जणांची प्रकृती चिंताजनक आहे. ही घटना भीमाशंकर मार्गावर घडली. या अपघातामध्ये जखमी झालेले प्रवासी हे भाविक असून ते भीमाशंकरला श्रावण महिना असल्याने दर्शनासाठी गेले होते. या अपघातामध्ये जखमी झालेल्यांमध्ये लहान मुलांचा सहभाग आहे. सर्वांवर सध्या रुग्णालयात उपचार सुरू आहेत.

मिळालेल्या माहितीनुसार, मंचरहून भीमाशंकरकडे जाणाऱ्या कारची भीमाशंकरहून दर्शन घेऊन परतणाऱ्या दोन रिक्षांना धडक झाल्याची प्राथमिक माहिती आहे. हा अपघात इतका भीषण होता की यामध्ये रिक्षामधील भाविक गंभीर जखमी झाले. यामधील अनेकांची प्रकृती चिंताजनक आहे.

अपघातानंतर स्थानिक नागरिकांनी तातडीने मदतकार्य करत जखमींना उपचारासाठी रुग्णालयात दाखल केले. कारमधील प्रवाशांनी मद्यसेवन केले असण्याचा प्राथमिक अंदाज व्यक्त केला जात असून अपघाताचे नेमके कारण समोर आले नाही. पोलिस या अपघाताचा तपास करत करत असून तपासातूनच अपघाताचे नेमकं कारण स्पष्ट होणार आहे.