कलाविषयक महत्वपूर्ण आणि दर्जेदार लेखन करणारे प्राध्यापक रमेशचंद्र पाटकर यांचे आज वृद्धापकाळाने निधन झाले. विल्सन कॉलेजमध्ये मराठीचे लोकप्रिय प्राध्यापक असणाऱ्या रमेशचंद्र पाटकर यांनी आयुष्यभर दृश्यकला आणि दृश्यकलालेखना संदर्भात असलेला ध्यास मनःपूर्वक जोपासला होता.

आज महाराष्ट्रात चित्रकलेचे शिक्षण घेतलेल्या अनेकांनी पाटकर यांनी लिहिलेले 'कलेचा इतिहास ' या पुस्तकातूनच कलाइतिहासाचे प्राथमिक धडे गिरवलेत. याशिवाय रमेशचंद्र पाटकर यांनी ' महाराष्ट्राच्या नियतकालिकातील कलाविचार ' हे संशोधनपर पुस्तक अत्यंत चिकाटीने पूर्णत्वास नेऊन महाराष्ट्राच्या कला जगतास मोलाची देणगी दिली. पाटकर यांनी अनेक पुस्तके लिहिली असून त्यांनी दृश्यकलेच्या क्षेत्रातील सर्वच तरुण कलावंत, कलासमीक्षक आणि कलावंतांना कायमच मनःपूर्वक प्रोत्साहन दिले.

आयुष्यभर मार्क्सवादी विचारसरणीशी निष्ठापूर्वक बांधिलकी ठेवणाऱ्या पाटकर यांनी अनेक देशी व परदेशी लेखक ,लेखिकांच्या लेखांचे आणि कवितांचे मानवतावादी दृष्टिकोनातून भाषांतर केले. लोकवांग्मय गृहातर्फे प्रकाशितही झाले आहे. अत्यंत शांत,सुस्वाभावी ,हसतमुख आणि कायमच विधायक विचार करणारे एक चिंतनशील व्यक्तिमत्व आज आपल्याला सोडून गेले आहे.