मुंबई : मुंबै बँकेची निवडणूक नुकतीच पार पडली आहे. यामध्ये प्रवीण दरेकर यांनी मजूर प्रवर्गामधून अर्ज (Application) भरला होता. यावर आक्षेप घेत तक्रार दाखल करण्यात आली आहे. सहकार विभागाने (Co-operation Department ) या तक्रारीची दखल घेत चौकशीनंतर प्रवीण दरेकर (Praveen Darekar) हे मजूर नसल्याचे सांगत त्यांना अपात्र ठरवले आहे. मजूर म्हणून प्रवीण दरेकर हे सदस्यत्वाला अपात्र (Ineligible) असल्याचे सहकार विभागाने सांगितले आहे.

हे देखील पहा-

विधान परिषदेमध्ये (Legislative Council) विरोधी पक्ष नेते प्रवीण दरेकर यांना सहकार विभागाने तुम्ही मजूर आहात का? अशी विचारणा करणारी नोटीस पाठवली होती. यावर आता सहकार विभागाने चौकशी करत दरेकर मजूर नसल्याचे अहवाल दिले आहे. सहकार विभागाने प्रविण दरेकर यांना अपात्र ठरवताना अनेक गोष्टीकडे लक्ष वेधले आहे. मजूर (Labor) म्हणजे अंगमेहनतीचे आणि शारिरीक श्रमाचे काम करणारी व्यक्ती, तसेच त्याचे उपजिविकेचे मुख्य साधन हे मजुरीच असणार आहे. मात्र, दरेकर यांनी विधान परिषदेच्या निवडणुकीवेळी (Election) दिलेल्या प्रतिज्ञापत्रामध्ये त्यांनी उत्पन्नाचे साधन म्हणून स्वतंत्र व्यवसाय असे यावेळी नमूद केले आहे.

दरेकर यांची मालमत्तासुद्धा २ कोटी ९ लाख रुपये इतकी आहे. त्यांच्या नावावर ९० लाख रुपयांची संपत्ती असल्याचे विधान परिषदेवेळी दिलेल्या प्रतिज्ञापत्रामध्ये आहे. शिवाय विधान परिषदेचे सदस्य म्हणून अंदाजे अडीच लाख रुपये मासिक उत्पन्न प्राप्त होत असल्याचे देखील दिसून आल्याने तुम्हाला मजूर म्हणता येणार नाही असेही सहकार विभागाने त्यांच्या आदेशामध्ये स्पष्ट केले आहे. दरम्यान, मजूर म्हणून दरेकर अपात्र ठरले असले तरी त्यांचा मुंबै बँक निवडणुकीच्या निकालावर फारसा परिणाम पडणार नाही. दरेकर हे दुसऱ्या प्रवर्गातून मुबै बँक निवडणुकीमध्ये बिनविरोध निवडून आले आहेत. शिवाय मुंबै बँकेवर देखील त्यांच्याच पॅनेलने वर्चस्व राखले आहे.

Edited By- Digambar Jadhav