मुंबई : मनसेचे पुणे शहरध्याक्ष वसंत मोरे यांची शहराध्यक्ष पदावरुन हकालपट्टी केल्यानंतर नगरसेवक साईनाथ बाबर यांच्याकडे शहराध्यक्ष पदाची जबाबदारी दिली गेली आहे. राज्यातील सर्वच पक्ष वसंत मोरेंना आपल्या पक्षात घेण्यासाठी इच्छूक आहेत. आता राष्ट्रवादीचे शहराध्यक्ष प्रशांत जगताप यांनी त्यांना खुलं आवाहन केले आहे.

वसंत मोरे (Vasant More) यांचा राष्ट्रवादीमध्ये मान, सन्मान जपला जाईल. त्याचबरोबर ज्या कोणत्या कार्यकर्त्यांच्या भावना दुखवल्या असतील त्यांनीही पक्षात यावं असं आवाहन प्रशांत जगताप यांनी केले आहे. वसंत मोरेंच्या भूमिकेकडे सर्वांचे लक्ष होते. परंतु एका वृत्तवाहिनीशी बोलताना त्यांनी मी अजूनही राज ठाकरेंचा मनसैनिक आहे. मी साईनाथ बाबर यांच्यासोबत काम करेल असे ते म्हणाले आहेत.

दरम्यान राष्ट्रवादी आणि शिवसेना वसंत मोरेंच्या संपर्कात असल्याची माहिती समोर आली आहे. राज ठाकरे (Raj Thackeray) यांच्या मशिदीवरील भोंग्यांविरोधातील भूमिकेबाबत वसंत मोरे (Vasant More) यांनी वेगळी भूमिका घेतली होती. ही भूमिका घेणं त्यांना चांगलच महागात पडलं आहे. कारण आज मनसेने पुणे शहराध्यक्ष पदावरून वसंच मोरे यांना हटवलं असून त्या जागी राज ठाकरे यांच्या आदेशानं नगरसेवक साईनाथ बाबर (Sainath Babar) यांची पुणे शहराध्यपदी निवड करण्यात आली आहे.

अशातच आता मनसेकडून डावललेल्या वसंत मोरेंना (Vasant More) आपल्या पक्षात घेण्यासाठी राजकीय पक्ष चर्चा करत असल्यातं समोर येत आहे. याबाबत त्यांनी स्वत: सगळ्या पक्षांनी ऑफर दिली असल्याचं सांगितलं असून त्यात राष्ट्रवादी आणि शिवसेना प्रत्यक्ष भेटले असल्याचंही त्यांनी सांगितलं आहे. त्यामुळे आता वसंत मोरे यांच्या पुढील निर्णयाकडे सर्वांच लक्ष लागून राहिलं आहे.

Edited By: Pravin Dhamale