जयश्री मोरे, मुंबई

Trombay News: मुंबईतल्या अनुशक्तीनगरमध्ये (Anushakti Nagar) दोन सख्ख्या भावांवर तलवारीने हल्ला केल्याची धक्कादायक घटना समोर आली आहे. या घटनेमध्ये एका भावाचा जागीच मृत्यू झाला. तर दुसरा भाऊ गंभीर जखमी झाला असून त्याच्यावर नजीकच्या रुग्णालयामध्ये उपचार सुरु आहेत. या घटनेमुळे ट्रॉम्बे परिसरात (Trombay Area) एकच खळबळ उडाली आहे.

मिळालेल्या माहितीनुसार, सोमवारी रात्री ट्रॉम्बेच्या चित्ता कॅम्पमध्ये ही घटना घडली. शुल्लक कारणावरुन काही तरुणांमध्ये वाद झाला. या वादानंतर मलिक शेख नावाच्या तरुणावर आणि त्याच्या भावावर तलवारीने वार करण्यात आले. या वादामध्ये मलिकचा जागीच मृत्यू झाला. तर त्याचा भाऊ गंभीर जखमी झाला आहे. या घटनेनंतर आरोपींनी घटनास्थळावरुन पळ काढला.

जीवघेणा हल्ल्याची ही घटना सीसीटीव्हीमध्ये (CCTV) कैद झाली आहे. या घटनेचा माहिती मिळताच पोलिसांनी घटनास्थळी धाव घेत तपास सुरु केला. जखमी झालेल्या मलिकच्या भावाला उपचारासाठी रुग्णालयात दाखल करण्यात आले. तर मलिकचा मृतदेह शवविच्छेदनासाठी रुग्णालयामध्ये पाठवण्यात आला. याप्रकरणी ट्रॉम्बे पोलिसांनी (Trombay Police) रात्री उशिरा गुन्हा दाखल करत तपास सुरू केला आहे.