Ajit Pawar News : राष्ट्रवादीचे नेते, विरोधी पक्षनेते अजित पवार यांनी मुख्यमंत्री एकनाथ शिंदे यांच्यावर जोरदार हल्लाबोल केला आहे. 'मुख्यमंत्री एकनाथ शिंदे हे त्यांच्या जवळच्या आमदारांना खूश ठेवण्यासाठी पॉझिटिव्ह रीमार्क देतात. त्यानंतर त्याची अंमलबजावणी करणं अधिकारी वर्गाला जड जाते, असा गंभीर आरोप अजित पवार यांनी मुख्यमंत्री एकनाथ शिंदे यांच्यावर केला आहे. (Latest Marathi News)

विरोधी पक्षनेते अजित पवार (Ajit Pawar) हे आज, रविवारी पुणे दौऱ्यावर आहेत. अजित पवार यांनी बारामतीत पत्रकारांशी संवाद साधला. त्यावेळी अजित पवारांनी मुख्यमंत्र्यांवर टीकास्त्र सोडलं. अजित पवार म्हणाले, 'मुख्यमंत्री एकनाथ शिंदे (Eknath Shinde) हे कागदपत्रांची शहानिशा करून मग त्यावर शेरे मारत आहेत. यापूर्वीही महाराष्ट्राचे अनेक मुख्यमंत्री, उपमुख्यमंत्री, मंत्री होऊन गेले यांनी कधीही असला निर्णय घेतला नाही'.

'परंतु मुख्यमंत्री हे त्यांच्या जवळच्या आमदारांना खुश ठेवण्यासाठी ते पॉझिटिव्ह रीमार्क मारतात. त्यानंतर त्याची अंमलबजावणी करणं अधिकारी वर्गाला जड जाते. यातूनच अधिकारी वर्गात देखील थोडंसं नैराश्य आले होते. ते देखील नाराजीने बोलत होते. हे कुठेतरी थांबले पाहिजे मग याला पर्याय काय तर मारलेला रिमार्क संबंधित अधिकाऱ्यांनी तपासून ते व्यवस्थित मुख्यमंत्र्यांना सांगावी मग मुख्यमंत्री त्याबाबत अंतिम निर्णय घेतील, असे अजित पवार पुढे म्हणाले.

'वास्तविक असे करण्यापेक्षा सरळ सदरची मागणी तपासून नियमाप्रमाणे कारवाई करावी परत ते बघण्याचं कारणच नाही, उलट यामुळे कागदपत्रांचे फायलिंग वाढत जाणार आहे, असा टोलाही विरोधी पक्षनेते अजित पवार यांनी लगावला.