सिद्धेश म्हात्रे, साम टीव्ही

भरधाव कारने रस्त्याच्या कडेला उभ्या असलेल्या 5 दुचाकींना जोरदार धडक दिली. यानंतर कार एका पानटपरीला जाऊन धडकली. या भीषण अपघातात तिघेजण गंभीर जखमी झाले आहेत. अपघातानंतर कारचालक फरार झाला असून पोलीस त्याचा शोध घेत आहेत. अपघाताचा थरार दुकानातील सीसीटीव्ही कॅमेऱ्यात कैद झालाय.

अपघातातील जखमींना उपचारासाठी रुग्णालयात दाखल करण्यात आलंय. यातील काहींची प्रकृती चिंताजनक असल्याचं कळतंय. उरणमधील (Uran News) द्रोणागिरी नोड येथील देवकृपा चौकात शनिवारी रात्री 8 वाजेच्या सुमारास ही घटना घडली आहे.

मिळालेल्या माहितीनुसार, देवकृपा चौकात एक पानटपरी असून येथे नेहमीच नागरिकांची वर्दळ असते. शनिवारी रात्री आठ वाजेच्या सुमारास पानटपरीवर काही लोक आले होते. त्यांनी रस्त्याच्या कडेला आपल्या दुचाक्या उभ्या केलेल्या होत्या.

त्याचवेळी अचानक भरधाव कार आली. काही क्षणातच या कारने दुचाकींना जोरदार धडक दिली. कारचा वेग इतका जास्त होता, की दुचाकींना धडक (Accident) दिल्यानंतर कार थेट पानटपरीच्या भिंताला जाऊन आदळली. या अपघातात तिघे जण गंभीर जखमी झाले.

अपघातानंतर परिसरात मोठी आरडाओरड झाली. नागरिक येत असल्याचं बघताच कारचालकाने घटनास्थळावरून धूम ठोकली. दरम्यान, अपघातात गंभीर जखमी झालेल्या व्यक्तींना स्थानिकांनी तातडीने उपचारासाठी रुग्णालयात दाखल केले. अपघाताचा हा थरार सीसीटीव्ही कैद झाला असून पोलीस कारचालकाचा शोध गेत आहेत.