तबरेज शेख

Nashik Weather Update: नाशिक: गेल्या दोन महिन्यांपासून थंडीचा कडाका सहन करणाऱ्या नाशिकमध्ये उन्हाचा तडाखा वाढायला सुरुवात झाली आहे. नाशिकमध्ये 35.5 अंश सेल्सिअंश कमाल तापमानाची नोंद करण्यात आली आहे. तर किमान तापमान 13.6 अंश इतके नोंदविले गेले (Nashik Summer Stars Temperature Increases To 35 Celsius). 

मार्चच्या पहिल्या आठवड्यापासूनच तापमान (Weather Update) वाढायला सुरुवात होते. मात्र, यंदा फेब्रुवारीतच उन्हाच्या झळा बसण्यास सुरुवात झाली आहे. त्यामुळे नाशिककर बाहेर पडतांना चष्मा, टोपी, स्कार्फचा आधार घेत आहेत. तर, गर्मीपासून दिलासा मिळवण्यासाठी नागरिक थंड पेयच्या दुकानात गर्दी करतांना दिसत आहेत.

नाशिकमध्ये उन्हामुळे रस्त्यांवर देखील शुकशुकाट दिसत आहे. हळूहळू कमाल तापमानात दिवसागणिक वाढ होत असून, येत्या काही दिवसांत तापमान चाळिशी गाठेल, असा अंदाज व्यक्त केला जात आहे. एव्हाना एप्रिल आणि मे महिन्यात उन्हाच्या तप्त झळांनी हैराण व्हायला होते. मात्र, सध्या फेब्रुवारीतच नागरिकांच्या शरीराची लाहीलाही व्हायला सुरुवात झाली आहे.

पुढील काही दिवस तापमानाचा हा वाढता पारा कायम राहणार असून गरम आणि कोरड्या वाऱ्यांमुळे तापमान वाढत जाणार आहे, अशी माहिती हवामान खात्याकडून देण्यात आली आहे.

Edited By - Nupur Uppal