नंदुरबार : राज्यात दिवसेंदिवस अपघातांचं प्रमाण वाढत चाललं आहे. याचदरम्यान, नंदुरबारमध्ये पुन्हा एक अपघात झालाय. या अपघातात एका २० वर्षीय तरुणाचा मृत्यू झाला आहे. शहादा धडगाव घाटात मोटरसायकलचा भीषण अपघात झाला आहे. घाटातील वळणाच्या रस्त्यावर अज्ञात वाहनाने बाईकला मागून जोरदार धडक दिली. घाटातील कामोद गावाजवळ बाईक चालवणाऱ्या तरुणाला चिरडलं. या अपघातात एकाची प्रकृती चिंताजनक आहे. अपघात झाल्यानंतर अज्ञात वाहनचालक घटनास्थळावरुन फरार झाला. या दुर्घटनेबाबत धडगाव पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे.

डंपरच्या धडकेत दोघांचा मृत्यू

दरम्यान, पुण्यातील शिरुर तालुक्यातील मांडवगण फराटा येथे डंपर आणि पिकअपची जोरदार धडक दिल्याने भीषण अपघात घडला आहे. या भिषण अपघातात दोघांचा जागीच मृत्यू तर एक जण गंभीर जखमी झाला आहे. या दुर्दैवी घटनेत सागर संभाजी कोळपे (वय २८) आणि यश सुधाकर भिसे (वय १२) यांचा जागीच मृत्यू झाला, तर अनिल बिरा कोळपे हे गंभीर जखमी झाले आहेत.

डंपर चालकाने चुकीच्या दिशेने वाहन चालवत पिकअपला धडक दिली. अपघातानंतर चालक घटनास्थळावरून फरार झाला. शिरूर पोलिसांनी त्याच्याविरुद्ध गुन्हा दाखल करून तपास सुरू केला आहे.या घटनेने मांडवगण फराटा आणि परिसरात हळहळ व्यक्त केली जात आहे. जखमी अनिल कोळपे यांच्यावर रुग्णालयात उपचार सुरू असून, त्यांची प्रकृती चिंताजनक आहे. पोलिस फरार चालकाचा शोध घेत आहेत.