संजय गडदे, साम प्रतिनिधी

जोगेश्वरी (पूर्व) परिसरात बनावट क्राईम ब्रांच पोलीस असल्याची बतावणी करून एका सुवर्ण व्यावसायिकाचे अपहरण करत पिस्तुलाचा धाक दाखवून १२.५० लाखांची रोकड आणि १० ग्रॅम सोन्याचे तुकडे असा एकूण १३.३० लाखांचा मुद्देमाल लुटणाऱ्या आंतरराज्यीय टोळीचा मेघवाडी पोलिसांनी पर्दाफाश केला आहे. या प्रकरणी पाच आरोपींना महाराष्ट्र, मध्य प्रदेश आणि पश्चिम बंगालमधून अटक करण्यात आली आहे.

२० जून २०२६ रोजी रात्री साडेदहाच्या सुमारास तक्रारदार खोकन निताई मंडळ हे दुकान बंद करून रोकड व सोन्याचे तुकडे घेऊन जात असताना तीन जणांनी स्वतःला क्राईम ब्रांचचे पोलीस असल्याचे सांगत त्यांना जबरदस्तीने कारमध्ये बसवले. गाडीत पिस्तुलाचा धाक दाखवत मारहाण करून त्यांच्याकडील रोकड आणि सोने हिसकावून आरोपी पसार झाले.

घटनेनंतर मेघवाडी पोलिसांनी परिसरातील सीसीटीव्ही फुटेज, मोबाईल डम्प डेटा आणि तांत्रिक पुराव्यांच्या आधारे तपास सुरू केला. तपासादरम्यान आरोपींचा माग काढत पोलिसांनी कांदिवली, वसई, लोकमान्य टिळक टर्मिनस, उज्जैन आणि हावडा येथे धाड टाकून टोळीतील प्रमुख आरोपींना अटक केली.

या कारवाईत ६.१८ लाख रुपये रोख, १० ग्रॅम सोन्याचे तुकडे, देशी बनावटीचे पिस्तुल, चार जिवंत काडतुसे, गुन्ह्यात वापरलेली कार, बनावट पोलीस ओळखपत्रे आणि बनावट आधार कार्ड जप्त करण्यात आले आहे.

मेघवाडी पोलीस ठाण्यात भारतीय न्याय संहिता (BNS) तसेच शस्त्र कायद्यान्वये गुन्हा दाखल करण्यात आला असून या टोळीतील इतर आरोपींचा शोध सुरू आहे. वरिष्ठ पोलीस निरीक्षक किरण शाळीग्राम यांच्या मार्गदर्शनाखाली वरिष्ठ पोलीस निरीक्षक श्याम पावरे, सहाय्यक पोलीस निरीक्षक सम्राट वाघ आणि त्यांच्या पथकाने ही उल्लेखनीय कारवाई केली.