मुंबई: राणा दाम्पत्याने खार पोलिसांवरती गंभीर स्वरुपाचे आरोप केले होते. आम्हाला जेलमध्ये पाणी दिले नाही, जातीवाचक बोलले, मला टॉयलेटला जाऊ दिले नाही अशा आशयाचे पत्र खासदार नवनीत राणा (Navneet Rana) यांनी लोकसभा अध्यक्षांना लिहिले होते. त्यानंतर लोकसभा सचिवालयाने याची गंभीर दखल घेत मुंबई पोलिसांना (Mumbai Police) याचा अहवाल मागीतला होता. राणा दाम्पत्याच्या या आरोपानंतर आता मुंबईचे पोलीस आयुक्त संजय पांडे (Sanjay Pande) यांनी एक ट्वीट करुन सत्यता मांडण्याचा प्रयत्न केला आहे.

संजय पांडे यांनी पोलीस स्टेशनमधील सीसीटीव्ही फुटेज आपल्या अधिकृत ट्वीटरवरुन पोस्ट केले आहे. त्यामुळे आता राणा दाम्पत्याने केलेल्या आरोपामध्ये किती तथ्य आहे हे तपासले जाईल. संजय पांडे यांनी आमदार रवी राणा आणि खासदरा नवनीत राणा यांचा चहा पितानाचा एक व्हिडिओ शेअर केला आहे. राणा दाम्पत्याला पोलीस स्टेशनमध्ये चांगली वागणूक देण्यात येत असल्याचे यातून सांगण्याचा प्रयत्न केला आहे.

दरम्यान राज्यात हनुमान चालीसावरुन राजकारण तापले आहे. राणा दाम्पत्याने मुख्यमंत्री उद्धव ठाकरे यांच्या घरासमोर जाऊन हनुमान चालीसा म्हणण्याची इच्छा व्यक्त केली. त्यानंतर शिवसैनिकांनी राणांच्या खारच्या घराबाहेर त्याचबरोबर मातोश्रीसमोर तळ ठोकला. राणा दाम्पत्यावरती सरकारी कामात अडथळा आणल्यामुळे काही कलमांअंतर्गत गुन्हा दाखल करण्यात आला. आता राणा दाम्पत्य खार पोलीस स्टेशनमध्ये आहे.

Edited By: Pravin Dhamale