विकास काटे, साम टीव्ही

ठाणे: मुंबई-नाशिक महामार्गावर खारेगाव टोलनाक्याजवळ मंगळवारी पहाटे एका भीषण अपघातात 26 वर्षीय तरुणाचा मृत्यू झाला असून इतर चार जण गंभीर जखमी झाले आहेत. वागळे इस्टेट येथील 'अशार आयटी पार्क'मध्ये काम संपवून डोंबिवलीला घरी परतणाऱ्या कर्मचाऱ्यांच्या कारचे नियंत्रण सुटल्याने हा अपघात झाला.

मिळालेल्या महितीनुसार, मंगळवारी (14 ) पहाटेला 3.55 च्या सुमारास हुंदाई ऑरा कार ( क्रमांक MH 04 MR 0339) मुंबईहून नाशिकच्या दिशेने जात होती. खारेगाव टोलनाक्याजवळील नायरा पेट्रोलपंप परिसरात चालकाचे वाहनावरील नियंत्रण सुटले आणि ही कार समोर उभ्या असलेल्या अशोक लेलँड ट्रेलर ट्रकला (MH 43 CE 5328) मागून जोरात धडकली. ही धडक इतकी भीषण होती की कारचा चालक कारमध्येच अडकून पडला होता.

घटनेची माहिती मिळताच वाहतूक पोलीस, अग्निशमन दलाचे जवान आणि आपत्ती व्यवस्थापन कक्षाचे कर्मचारी क्रेन आणि रुग्णवाहिकासह घटनास्थळी दाखल झाले. कारमध्ये अडकेलेल चालक दीपक पाटेकर ( 26 वर्षे, रा. वागळे इस्टेट) यांना जवानांनी बाहेर काढून कळवा येथील छत्रपती शिवाजी महाराज रुग्णालायत दाखल केले. त्यांच्या डोक्याला गंभीर दुखापत झाली होती.

सुजय पाटील (२० वर्षे, रा. डोंबिवली) प्राथमिक उपचारानंतर त्यांना घणसोली येथील रुग्णालयात हलवण्यात आले आहे. राज चिले (२१ वर्षे) आणि सुगम जयस्वाल (२४ वर्षे) दोघांच्या डोक्याला गंभीर इजा झाली असून प्रकृती चिंताजनक असल्याने त्यांना ठाण्यातील ज्युपिटर हॉस्पिटलमध्ये दाखल करण्यात आले आहे. स्नेहल भूसेकर (२३ वर्षे) किरकोळ जखमी असून त्यांच्यावर कळवा रुग्णालयात उपचार सुरू आहेत.