संजय गडदे, साम प्रतिनिधी

पश्चिम रेल्वेकडून ब्रिजच्या री-गर्डरिंग कामासाठी जम्बो ब्लॉक घेण्यात आला आहे. या ब्लॉकमुळे तब्बल 300 लोकल गाड्या रद्द करण्यात आल्या आहेत. कांदिवली आणि बोरिवली स्थानकांदरम्यान अप व डाऊन धीम्या मार्गावर हा ब्लॉक घेण्यात आला. या ब्लॉकमुळे पश्चिम रेल्वे मार्गावर प्रवाशांची प्रचंड गर्दी झाल्याचं पाहायला मिळत आहे. कांदिवली, मालाड, राम मंदिर आणि गोरेगाव स्थानकांवर प्रवाशांची प्रचंड गर्दी झाली. संध्याकाळच्या गर्दीच्या वेळी प्रवाशांना तासन्तास प्लॅटफॉर्मवर थांबावे लागले.

या जम्बो ब्लॉकमुळे काही लोकल गाड्या बंद करण्यात आल्या आहेत. तर काही गाड्याचे मार्ग बदलण्यात आलेत. प्लॅटफॉर्म क्रमांक 1 आणि 2 वर देखभाल काम सुरू असल्यामुळे गाड्यांचे मार्ग बदलण्यात आले. विरार लोकल प्लॅटफॉर्म क्रमांक 3 वरून तर चर्चगेट लोकल प्लॅटफॉर्म क्रमांक 4 वरून सोडण्यात येत आहे. तर अनेक लोकल गाड्या फास्ट ट्रॅकवर वळवल्यामुळे वेळापत्रक विस्कळीत झाले आहे.