रेल्वे प्रवासी मित्रांनो कृपा लक्ष द्या, येत्या रविवारी मध्य आणि हर्बर मार्गावर मेगा ब्लॉक घेण्यात येणार आहे. ठाणे आणि कल्याण स्थानकांदरम्यान अप व डाऊन धीम्या मार्गावर ११.०० ते १६.०० वाजेपर्यंत मेगा ब्लॉक घेण्यात येणार आहे. उपनगरी विभागांवर विविध अभियांत्रिकी व आणि देखभालीची कामे करण्यासाठी मेगा ब्लॉक घेतला जाणार आहे. (Mega block on Mumbai Central and Harbour railway lines on July 27)

रविवारी कुठे बाहेर जाण्याचा प्लॅन असेल तर लोकल रेल्वेचं वेळापत्रक पाहूनच घराबाहेर पडा नाहीतर नाहक त्रास सहन करावा लागेल. कारण रविवारी २७ जुलै रोजी घेण्यात येणारा ब्लॉकमुळे ४ वाजेपर्यंत लोकल रेल्वे सेवा बंद असणार आहे. हर्बर मार्गावर ब्लॉक असल्याने या ब्लॉकच्या काळात छत्रपती शिवाजी महाराज टर्मिनस ते वाशी विभागापर्यंत विशेष लोकल सेवा चालवली जाईल.

मध्य रेल्वे मार्गावर अशी असेल वाहतूक व्यवस्था

ठाणे आणि कल्याण स्थानकांदरम्यान अप व डाऊन धीम्या मार्गावर ११.०० ते १६.०० वाजेपर्यंत मेगा ब्लॉक असणार आहे. मुलुंड स्थानक येथून १०.४३ ते १५.५३ पर्यंत सुटणाऱ्या डाऊन धीम्या /अर्धजलद ट्रेन, मुलुंड ते कल्याण दरम्यान डाऊन जलद मार्गावर वळविण्यात येतील. या गाड्या ठाणे, कळवा, मुंब्रा, दिवा आणि डोंबिवली स्थानकांवर थांबतील आणि आपल्या निर्धारित वेळेपेक्षा सुमारे १० मिनिटे उशिरा पोहोचतील.

कल्याण येथून १०.३६ ते १५.५१ पर्यंत सुटणाऱ्या अप धिम्या/अर्ध जलद ट्रेन, कल्याण आणि मुलुंड स्थानकांदरम्यान जलद मार्गावर वळवल्या जातील. या ट्रेन्स डोंबिवली, दिवा, मुंब्रा, कळवा आणि ठाणे स्थानकांवर थांबतील आणि मुलुंड स्थानकावर अप धिम्या मार्गावर पुन्हा वळवल्या जातील आणि नियोजित वेळेपेक्षा १० मिनिटे उशिरा पोहोचतील. तर ठाणे करता असलेल्या उपनगरी गाड्या निर्धारित डाऊन धीम्या मार्गावर चालवण्यात येतील. छत्रपती शिवाजी महाराज टर्मिनस मुंबई येथून ११.०० ते १७.०० वाजेपर्यंत सुटणाऱ्या आणि तेथे येणाऱ्या सर्व अप व डाऊन धीम्या लोकल सेवा सुमारे १० मिनिटे उशिराने पोहोचतील.

हार्बर मार्गावरील ब्लॉक असा असणार

पनवेल-वाशी अप आणि डाउन हार्बर मार्गावर सकाळी ११.०५ ते दुपारी ४.०५ पर्यंत (पोर्ट लाईन वगळून) आणि पनवेल येथे सकाळी ११.०५ ते संध्याकाळी ५.०५ पर्यंत मुंबई रेल्वे विकास कॉर्पोरेशन ब्लॉक राहणार आहे. पनवेल येथून १०.३३ ते १७.०७ पर्यंत छत्रपती शिवाजी महाराज टर्मिनस मुंबई येथे जाणाऱ्या अप हार्बर मार्गावरील सेवा आणि छत्रपती शिवाजी महाराज टर्मिनस मुंबई येथून ०९.४५ ते १५.४४ पर्यंत पनवेल/बेलापूरकडे जाणाऱ्या डाऊन हार्बर मार्गावरील सेवा रद्द करण्यात येणार आहेत.

पनवेल येथून ११.०२ ते १६.२६ पर्यंत ठाण्याकडे जाणाऱ्या अप ट्रान्स-हार्बर मार्गावरील सेवा आणि ठाणे येथून १०.०१ ते १६.२४ पर्यंत पनवेलकडे जाणाऱ्या डाऊन ट्रान्स-हार्बर मार्गावरील ट्रेन रद्द राहतील. तर ब्लॉक काळात छत्रपती शिवाजी महाराज टर्मिनस - वाशी विभागात विशेष लोकल सेवा चालवल्या जाणार आहेत.