मध्य रेल्वे प्रशासनाने कर्जत यार्ड सुधारणा प्रकल्पांतर्गत महत्त्वाची कामे हाती घेतली आहेत. यामध्ये ओव्हरहेड इलेक्ट्रिक (OHE) लाईनचे काम आणि अभियांत्रिकी दुरुस्तीची कामे होणार आहे. या पार्श्वभूमीवर कर्जत स्टेशन परिसरात ट्रॅफिक आणि पॉवर ब्लॉक लागू करण्यात आला आहे. या ब्लॉकमुळे कर्जत आणि खोपोली मार्गावरील काही उपनगरी गाड्यांच्या वेळापत्रकात बदल होणार असून काही गाड्या रद्द राहणार आहेत.

रेल्वे प्रशासनाने जाहीर केलेल्या माहितीनुसार, हे ब्लॉक सलग चार दिवस घेण्यात येणार असून त्यात काही गाड्या रद्द राहतील तर काही गाड्यांचे टर्मिनेशन/ओरिजिनेशन कर्जत येथेच होईल. CSMT वरून दुपारी १२.२० वाजता सुटणारी खोपोली लोकल – ही गाडी कर्जत येथेच शॉर्ट टर्मिनेट केली जाईल. कर्जत–खोपोली दरम्यान ही गाडी रद्द राहील. खोपोलीवरून १६.३० वाजता सुटणारी CSMT लोकल – ही गाडी खोपोलीवरून न सुटता कर्जतवरून शॉर्ट ओरिजनेट होईल. ही गाडी कर्जतवरून १६.५७ वाजता सुटेल. खोपोली–कर्जत दरम्यान ही गाडी रद्द राहील.

पहिला ब्लॉक : शनिवार, ०६ सप्टेंबर २०२५

कालावधी: दुपारी १४.३० ते १६.३० (एकूण २ तास)

कामाचा विभाग: अप मार्गावर – कर्जत (प्लॅटफॉर्म वगळून) ते नागनाथ केबिन (क्रॉसओव्हर वगळून)

गाड्यांवरील परिणाम:

कर्जतवरून १५.३९ वाजता सुटणारी खोपोली लोकल रद्द

खोपोलीवरून १४.५५ वाजता सुटणारी कर्जत लोकल रद्द

दुसरा ब्लॉक : रविवार, ०७ सप्टेंबर ते मंगळवार, ०९ सप्टेंबर २०२५

कालावधी: दुपारी १४.३० ते १७.०० (एकूण २ तास ३० मिनिटे)

कामाचा विभाग: अप मार्गावर – कर्जत (प्लॅटफॉर्म वगळून) ते नागनाथ केबिन (क्रॉसओव्हर वगळून)

मध्य रेल्वेच्या जनसंपर्क विभागाने प्रसिद्ध केलेल्या निवेदनानुसार, या ब्लॉक काळात प्रवाशांनी प्रवासाचे नियोजन करताना गाड्यांमधील बदलांचा विचार करावा. रेल्वे प्रशासनाने प्रवाशांना होणारा त्रास कमी करण्यासाठी पर्यायी व्यवस्था करण्याचे प्रयत्न सुरू असल्याचेही सांगितले आहे.