मुंबईतून मोठी बातमी समोर आली आहे. मुंबईतील कुर्ला येथील कुरेशी नगर परिसरात गुरुवारी मध्यरात्री डिमोलिशनच्या कामादरम्यान मोठा अपघात झाला. इमारत पाडण्याच्या कामासाठी वापरण्यात येणारी एक जड क्रेन अचानक उलटली. या क्रेनच्या मदतीने पोकलेन मशीन इमारतीच्या वरच्या भागात नेण्याचे काम सुरू होते. त्याचवेळी अचानक क्रेनचा तोल गेला आणि ती जोरात जमिनीवर कोसळली. क्रेनचा काही भाग जवळील दोन घरांवर तसेच मुंबई लोकलच्या ओव्हरहेड इलेक्ट्रिक वायरवर पडल्याने परिसरात मोठी खळबळ उडाली. या दुर्घटनेत ८ ते १० जण जखमी झाल्याची प्राथमिक माहिती आहे. जखमींना तातडीने जवळच्या रुग्णालयात उपचारासाठी दाखल करण्यात आले.

डिमोलिशनच्या कामादरम्यान दुर्घटना

कुरेशी नगर परिसरातील एका जुन्या इमारतीच्या पाडकामाचे काम सुरू होते. पोकलेन मशीन इमारतीच्या वरच्या भागात नेण्यासाठी मोठ्या क्रेनचा वापर करण्यात आला होता. मशीन वर उचलत असताना अचानक क्रेनचा तोल बिघडला. काही क्षणांतच संपूर्ण क्रेन उलटली आणि तिचा मोठा भाग आजूबाजूच्या परिसरात कोसळला. क्रेनचा काही भाग दोन घरांवर पडल्याने घरांमध्ये असलेल्या नागरिकांमध्ये घबराट निर्माण झाली. काही जण मलब्यात अडकल्याची माहिती असून स्थानिक नागरिक आणि बचाव पथकांनी तातडीने मदतकार्य सुरू केले.

घरांसह वाहनांचेही नुकसान

या अपघातात दोन घरांचे नुकसान झाले असून परिसरातील एक कार आणि ऑटो-रिक्षाचेही मोठे नुकसान झाले आहे. क्रेनचा भाग मुंबई लोकलच्या ओव्हरहेड इलेक्ट्रिक वायरवर पडल्याने रेल्वे सुरक्षेचाही प्रश्न निर्माण झाला. खबरदारीचा उपाय म्हणून घटनास्थळाचा परिसर सुरक्षित करण्यात आला. घटनेची माहिती मिळताच मुंबई पोलीस, अग्निशमन दल आणि इतर बचाव पथके घटनास्थळी दाखल झाली. सध्या क्रेन हटवण्याचे आणि परिसर सुरक्षित करण्याचे काम सुरू आहे.

घटनेचा तपास सुरु

दरम्यान, क्रेन नेमकी कोणत्या कारणामुळे उलटली, याचा तपास पोलिसांकडून सुरू आहे. तांत्रिक बिघाड, क्षमतेपेक्षा अधिक वजन किंवा कामादरम्यान झालेली चूक यापैकी नेमके कारण काय होते, याचा तपास केला जात आहे. बांधकाम आणि डिमोलिशनच्या कामात सुरक्षा नियमांचे पालन झाले होते का, याचीही चौकशी केली जाणार आहे.