मुंबईत कबुतरखान्याचा वाद पुन्हा एकदा चिघळलाय.. मराठी एकीकरण समितीनं जैन समाजाच्या अवाजवी मागणीविरोधात आंदोलनाचा इशारा दिल्यानंतर पोलिसांनी समितीच्या कार्यकर्त्यांना नोटीस पाठवली. त्यानंतर कबुतरखाना बंदीच्या समर्थनार्थ निघालेल्या आंदोलनातही पोलिसांनी अनेकांची धरपकड केली. इतकचं काय समितीच्या कार्यकर्त्यांना मारहाण केल्याचाही आरोप आहे. एकीकरण समितीच्या कार्यकर्त्यांनी जैन समाजाच्या आव्हानाला प्रतिआव्हान दिलयं.

दुसरीकडे शस्त्र उचलण्याची भाषा करणाऱ्या जैन मुनींनी आपल्या विधानावरून यु-टर्न घेत शांतीपूर्ण उपोषण करण्याचं विधान केलयं. तसंच मराठी एकीकरण समितीचा गैरसमज झालाय, याप्रकरणात राज ठाकरेकडे जाणार असल्याचंही जैन मुनींनी सांगितलयं.

आधी मीरारोड आणि आता दादरमधील मराठी माणसाचं आंदोलन या दोन्ही आंदोलनात मराठी माणसाला ताब्यात घेऊन मुस्कटदाबी करण्याच प्रयत्न केला गेला.. मात्र जैन समाजाविरोधात पोलिसांनी कुठलीच ठोस भूमिका घेतली नाही.. त्यामुळे पोलिस यंत्रणेवर कोणाचा दबाव आहे ? कबुतरखाना बंदीचा विषय सामाजिक आरोग्याशी निगडीत असतानाही या विषयाला धार्मिक रंग देऊन आगीत तेल ओतण्याचा प्रयत्न कोण करतंय? हाच खरा सवाल आहे. आगामी पालिका निवडणुकीच्या आधी मराठी विरुद्ध जैन वाद शमणार की आणखी वाढणार हे पाहणं महत्वाचं आहे.