Summary:

• नवी मुंबईकरांसाठी आनंदाची बातमी

• प्रजासत्ताक दिनाला मिळणार नवीन गिफ्ट

• हार्बर रेल्वे मार्गावर धावणार १४ एसी लोकल

• प्रवास आणखी आरामदायी आणि गारेगार होणार

हार्बर रेल्वे मार्गावरून प्रवास करणाऱ्या प्रवाशांसाठी आनंदाची बातमी आहे. हार्बर रेल्वे मार्गावरील लोकल प्रवास लवकरच गारेगार होणार आहे. या रेल्वे मार्गावर एसी लोकल चालवण्याबाबतचा निर्णय मध्य रेल्वे प्रशासनाने घेतला आहे. २६ जानेवारीपासून हार्बर रेल्वे मार्गावर १४ एसी लोकल धावणार आहेत. नवी मुंबईकरांसाठी हे प्रजासत्ताक दिनाचे मोठं गिफ्ट असणार आहे.

२६ जानेवारीपासून हार्बर रेल्वे मार्गावर सीएसएमटी/ वडाळा ते पनवेल या मार्गावर १४ एसी लोकल फेऱ्या धावणार आहेत. त्यामुळे नवी मुंबईकरांचा लोकल प्रवास आणखी आरामदायी आणि गारेगार होईल. प्रजासत्ताक दिनाचे औचित्य साधत मध्य रेल्वेने एसी लोकल चालवण्याबाबत निर्णय घेतला. आठवड्यातील सोमवार ते शनिवार या दिवसांमध्ये दिवसाला १४ एसी लोकल या मार्गावर धावतील. अप आणि डाऊन या दोन्ही मार्गावर लोकलच्या प्रत्येकी ७ फेऱ्या चालवण्यात येणार आहेत.

हार्बर रेल्वे मार्गावर १ डिसेंबर २०२१ पासून एसी लोकल सुरू करण्यात आली होती. पण एसी लोकलचे तिकीट आणि पासचे दर जास्त असल्यामुळे या लोकलला प्रवाशांकडून कमी प्रतिसाद मिळत होता. तसंच एसी लोकलमुळे सामान्य लोकलच्या फेऱ्या कमी झाल्यामुळे प्रवाशांमध्ये नाराजी होती. या लोकल बंद करून सामान्य लोकल चालवण्यात याव्यात अशा तक्रारी देखील रेल्वे प्रवाशांनी केल्या होत्या. त्यानंतर मध्य रेल्वेने एसी लोकल बंद करण्याचा निर्णय घेतला होता. पण आता एसी लोकल पुन्हा सुरू करण्याबाबतचा निर्णय घेण्यात आला आहे.

हार्बर रेल्वे मार्गावर एसी लोकल सुरू होणार असल्यामुळे नव्या नियोजनानुसार गर्दीच्या वेळेत धावणारी सकाळी ९.०९ वाजताची पनवेल-सीएसएमटी आणि सायंकाळी ५.३० वाजताची वडाळा रोड-पनवेल, रात्री ८ वाजताची सीएसएमटी-पनवेल या तीन सामान्य लोकल फेऱ्या रद्द करण्यात येतील. या लोकलच्या जागी एसी लोकल धावतील. सोमवार ते शनिवार दरम्यान वाशी ते वडाळा रोड, सीएसएमटी ते पनवेल, सीएसएमटी ते वाशी, वडाळा रोड ते पनवेल या अप आणि डाऊन मार्गावर प्रत्येकी ७ अशा १४ एसी लोकल धावतील. रविवार आणि सुट्टीच्या दिवशी एसी लोकल फेऱ्या रद्द राहतील. त्याऐवजी सामान्य लोकल फेऱ्या धावतील, असे रेल्वे प्रशासनाने सांगितले.