Summary -

• वाढदिवस साजरा करताना २१ वर्षीय तरुणाला मित्रांनी जिवंत जाळण्याचा प्रयत्न केला

• मुंबईतल्या कुर्ला परिसरात ही घटना घडली

• संपूर्ण घटना सीसीटीव्हीत कैद झाली असून व्हिडिओ व्हायरल झाला

• या प्रकरणी ५ तरुणांविरोधात गुन्हा दाखल करत पोलिसांनी अटक केली

मयूर राणे, मुंबई

वाढदिवसाचे सेलिब्रेशन करत असताना एका तरुणाला त्याच्याच मित्रांनी जिवंत जाळून टाकण्याचा प्रयत्न केल्याची धक्कादायक घटना समोर आली आहे. मुंबईतल्या कुर्ला परिसरातील ही घटना आहे. ही संपूर्ण घटना सीसीटीव्ही कॅमेऱ्यात कैद झाली असून तो व्हिडीओ व्हायरल होत आहे. या प्रकरणी पोलिसांनी ५ जणांविरोधात गुन्हा दाखल करत त्यांना अटक केली. या घटनेमुळे मुंबईत खळबळ उडाली.

मिळालेल्या माहितीनुसार, कुर्ला पश्चिम येथील कोहिनूर फेज - ३ बिल्डिंगमध्ये ही धक्कादायक घटना घडली. याठिकाणी २१ वर्षीय तरुणाचा वाढदिवस होता. त्याचा वाढदिवस साजरा करण्यासाठी त्याचे ५ मित्र आले होते. केक कापत असताना या तरुणाच्या मित्रांनी त्याच्या अंगावर पेट्रोल टाकून त्याला जिवंत जाळण्याचा प्रयत्न केला. ही संपूर्ण घटना सीसीटीव्ही कॅमेऱ्यात कैद झाली असून हा थरकाप उडवणारा व्हिडीओ व्हायरल होत आहे. या तरुणाला पेटवून दिल्यानंतर त्याचे मित्र त्याठिकाणी डान्स करताना सीसीटीव्हीत दिसत आहेत.

या घटनेमुळे मुंबई हादरली. या घटनेमध्ये तरुण गंभीर जखमी झाला असून त्याच्यावर राजावाडी रुग्णालयात उपचार सुरू आहेत. या घटनेची माहिती मिळताच कुर्ला पोलिसांनी घटनास्थळी धाव घेतली. पोलिसांनी ५ तरुणांविरोधात गुन्हा दाखल करत त्यांना अटक केली. या सर्व तरुणांनी असं कृत्य का केले? याची माहिती समोर आली नाही. सध्या पोलिस तपास करत आहेत.