Coastal Road Accident Death Toll : मुंबईतील कोस्टल रोडवर पहाटे भीषण अपघाताची घटना घडली. भरधाव वेगात असलेल्या एका काळ्या रंगाच्या बीएमडब्ल्यू (BMW) कारचा ताबा सुटल्याने हा अपघात झाला. या दुर्घटनेत ३ तरुणांचा मृत्यू झाला असून १ जण गंभीर जखमी झाला आहे. जखमीला जवळच्या रूग्णालयात दाखल कऱण्यात आले आहे. त्याची प्रकृती नाजूक असल्याचे बोलले जात आहे.

नेमकी घटना काय घडली?

कोस्टल रोड कंट्रोल रूमकडून मिळालेल्या माहितीनुसार, पहाटे ५:२० वाजेच्या सुमारास ही घटना उघडकीस आली. एक काळ्या रंगाची बीएमडब्ल्यू कार मरीन ड्राईव्हकडून हाजी अलीच्या दिशेने अत्यंत वेगाने जात होती. कोस्टल रोडवरील 'लाला कॉलेज'समोर आणि 'लोटस जेटी'जवळ आल्यानंतर चालकाचा कारवरील ताबा सुटला आणि कारचा भीषण अपघात झाला.

अपघातानंतर सर्व ४ जखमींना तातडीने नायर रुग्णालयात (Nair Hospital) उपचारासाठी दाखल करण्यात आले. पण त्यामधील तरूणांचा मृत्यू झाला. त्यामध्ये शनाय गज्जल (वय २१ वर्षे), धैर्य सेठ (वय १७ वर्षे) आणि आणखी एका २५ वर्षाच्या तरूणाचा मृत्यू झाला आहे. त्याची ओळख पटवणयाचे काम सुरू आहे. एका तरूणावर सध्या उपचार सुरू आहे. २० वर्षाच्या तरूण अत्यंत गंभीर अवस्थेत असून रुग्णालयाच्या ट्रॉमा वॉर्डमध्ये त्याच्यावर उपचार सुरू आहेत.

पोलीस तपास सुरू

हा अपघात अतिवेगामुळे (Overspeeding) झाल्याचा प्राथमिक अंदाज पोलिसांकडून व्यक्त करण्यात येत आहे. दुर्घटनेची माहिती मिळताच कोस्टल रोड पोलीस आणि संबंधित यंत्रणांनी घटनास्थळी धाव घेतली. मृत आणि जखमी तरुणांची अधिक ओळख पटवण्याचे काम सुरू आहे. पोलीस या प्रकरणी पुढील कायदेशीर तपास करत आहेत.