संजय गडदे, साम टीव्ही

मुंबई : मुंबईतून हादरवणारी घटना समोर आली आहे. मुंबईच्या चारकोप परिसरात एका बिल्डरवर गोळीबार करण्यात आला आहे. दोघांनी पेट्रोल पंपावर असलेल्या बिल्डरवर गोळीबार केला. दोन अज्ञातांनी झाडलेल्या गोळ्या थेट पोटात घुसल्याने बिल्डर गंभीर जखमी झाला आहे. या गोळीबारानंतर अज्ञात तरुण घटनास्थळावरून फरार झाले आहेत.

मुंबईच्या चारकोप परिसरात बिल्डरवर दोघांनी गोळीबार केला. चारकोपच्या बंदर पाखाडी परिसरातील पेट्रोल पंपासमोर अज्ञातांकडून बिल्डरवर गोळीबार करण्यात आला. फ्रेडी दिलीमा असे गोळीबार झालेल्या बिल्डरचे नाव आहे.

बिल्डर कारमध्ये बसले असताना दोघांनी गोळ्या झाडल्या. त्यांनी दोन ते तीन राउंड फायर केले. या हल्ल्यात फ्रेडी यांच्या पोटात दोन गोळ्या घुसल्या. गोळीबारानंतर अज्ञात तरुण घटनास्थळावरून फरार झाले. जखमी तरुणाला बोरिवली येथील ऑस्कर रुग्णालय उपचारासाठी दाखल करण्यात आले आहे. या गोळीबाराच्या घटनेने परिसरात खळबळ उडाली आहे.

नेमकं काय घडलं?

मुंबईच्या कांदिवलीपश्चिमच्या चारकोप परिसरातील फादर सुसाई इंग्रजी शाळेजवळ बिल्डर हा गाडी पार्क करत होता. त्याचवेळी अज्ञाताकडून गोळीबार करण्यात आला. या घटनेची माहिती मिळताच पोलीस घटनास्थळी पोहोचले.त्यांच्याकडून पंचनामा देखील करण्यात आला आहे. तसेच फॉरेन्सिक टीमकडून पुरावे देखील गोळा करण्यात आले. रुग्णालयात दाखल केलेल्या बिल्डरच्या पोटातून डॉक्टरांनी यशस्वीरित्या गोळ्या काढण्यात आल्या आहेत.